Leerlijn project hondenwelzijn
Recientemente Minister di Enseñansa a reuni cu expertonan den educacion relaciona cu material di educacion cu ta wordo desaroya pa scol preparatorio y basico.
Minister di Enseñansa, Endy Croes, hunto cu colega Minister, Ursell Arends, a reuni cu maestro- y expertonan den educacion (“onderwijsdeskundigen”). Sra. Jumira Spier, Sra. Audry Vasques, Sra. Mirscha Winterdal y Sr. Henry Barrera tabata presente unda a presenta e material di educacion tocante bienestar di cacho na Minister Croes, Minister Arends y director di Departamento di Enseñansa di Aruba (DEA) Sra. Anne-Marie Proveyer.
E material di educacion a wordo desaroya pa scol preparatorio y basico, pa cumpli cu e compromiso haci den cuadro di e Plan Nacional pa atende cu e problematica di cacho na Aruba -“National Plan for Stray Animals” (NPSA), y tin como meta pa e material di educacion aki, por drenta enseñansa.
Minister Endy Croes, Minister Ursell Arends y director di DEA, Sra. Anne Marie Proveyer a keda hopi satisfecho cu locual a wordo presenta, caminda profesionalismo y calidad ta resalta teniendo cuenta cu e habilidadnan desea den siglo 21.
Minister Croes tabatin mester di aprobacion di DEA pa por a propone e proyecto piloto na e directivanan di scol. E material di educacion aki lo por drenta algun scol preparatorio y basico como como un proyecto piloto e aña escolar venidero, 2023-2024.
Director di DEA Sra. Proveyer ta bezig cu su conseho tocante esaki, pa Minister Croes por sigui cu e siguiente paso pa haya scolnan piloto. Mientrastanto, Minister Ursell Arends lo percura pa hinca e material den tal formato cu e por wordo uza entrante e prome dia di e aña escolar nobo, esta 17 di augustus 2023.
