IPA ta invita bo pa su Dia Publico
“Talk IPA to me!” Esaki ta e tema di Instituto Pedagogico Arubano (IPA) su Dia Publico (open dag) cu lo tuma luga diasabra 4 di november di 10:00 am – 12:30 pm na IPA (Isaac Wagemakerstraat 11).
Durante open dag lo duna informacion di e estudio pa Maestro di Enseñansa Primario, Bachelor Nederlands als Vreemde Taal, Curso di Certificacion Pedagogico Didactico (PDG) y asina yama 21+ Toets.
Tuma nota cu cada estudio tin su grupo meta y orario specifico pa por haya informacion.
Estudio pa Maestro di Enseñansa Primario
E estudio pa Maestro di Enseñansa Primario ta forma maestro cu ta cualifica pa duna les na mucha di scol preparatorio y/ of scol basico. Durante open dag lo tin 2 sesion cu e bishitante lo por atende pa ricibi informacion di e estudio. E orario di sesion 1 ta 10:15 am y di sesion 2 ta 11:00 am.
Bachelor Nederlands als Vreemde Taal
Bachelor Nederlands als Vreemde Taal ta un estudio pa bira docente Bachelor di Hulandes cu ta cualifica pa duna les na alumno di EPB, EPI, mavo y e prome tres añanan di havo y vwo. E orario di sesion 1 ta 10:30 am y di sesion 2 ta 11:30 am.
Pa inscribi pa e dos estudionan ya menciona mester tin diploma di havo, vwo of mbo nivel 4 (of den examenklas di un di esakinan).
21+ Toets
Tur persona cu desde 1 di september 2025 tin minimo 21 aña y cu kier haci un estudio na IPA pero no tin diploma di sea havo, vwo of mbo nivel 4, ta bin na remarca pa haci e asina yama 21+ Toets. E 21+ Toets ta midi si bo tin e nivel di havo cu ta necesario pa por studia na IPA. Si bo logra pasa e 21+ Toets cu exito bo por inscribi pa un estudio inicial cu IPA lo ofrece durante aña academico 2025-2026. Asina cu bo inscribi bo ta bin na remarca pa participa na e test di admision (beroepstest) y e programa preparatorio (voorprogramma) cu lo tuma luga durante aña academico 2024-2025. Si bo logra pasa e test di admision cu exito y completa e programa preparatorio bo por cuminsa cu bo estudio na augustus 2025. E orarionan cu bo lo por ricibi informacion general di 21+ Toets ta sea 10:30 am of 11:30 am.
PDG
PDG ta un curso parcial pa e profesionalnan cu kier continua nan carera den ramo di enseñansa. Pa medio di e curso di PDG e profesionalnan por desaroya competencia pedagogico y didactico. E orarionan cu bo lo por ricibi informacion general di e estudio aki ta sea 10:30 am of 11:30 am.
Durante e dia publico tambe lo tin:
Benta di pasaboca
E studiantenan di aña 3 di estudio pa Maestro di Enseñansa Primario lo t’ey presente cu benta di pasaboca. Meta di esaki ta pa recauda fondo pa e pasantia internacional cu ta forma parti di e curiculo di nan estudio.
Actividad pa mucha
Lo tin actividad specialmente pa muchanan cu lo asisiti e open dag. Di e forma aki tur adulto por asisti na e sesionnan di informacion sin mester preocupa pa e chikitin mirando cu e lo ta bon entretene.
Pa mas informacion, por bishita nan website www.ipaaruba.com of pagina di facebook y si ainda bo tin cualkier pregunta, por tuma contacto cu Studenten Services na 5243100.
Info / Contact
Pa mas informacion por busca den e alfabet menu riba nos pagina principal:
Por tuma contacto cu:
Scroll To Top
