IPA cu anochi di informacion tocante 21+ Toets
Instituto Pedagogico Arubano (IPA) ta tene un anochi di informacion tocante 21+ Toets dia 26 di october 2026.
Bo ta desea di haci e estudio pa Maestro di Enseñansa Primario pero pa motibo di circumstancia di bida bo no a logra termina sea havo, vwo of mbo nivel 4? Cu 21+ Toets bo deseo por bira realidad!
Tur persona cu desde 1 di september 2027 tin minimo 21 aña y cu kier haci un estudio na IPA, pero no tin diploma di sea havo, vwo of mbo nivel 4, por inscribi pa haci e asina yama 21+ Toets.
E 21+ Toets ta midi si bo tin nivel di havo cu ta necesario pa por studia na IPA. Si bo logra pasa e 21+ Toets cu exito, bo por inscribi pa e estudio pa Maestro di Enseñansa Primario cu IPA lo ofrece durante aña academico 2027-2028.
Asina cu bo inscribi bo ta bin na remarke pa participa na e test di admision (beroepstest) y e programa preparatorio (voorprogramma) cu lo tuma luga durante aña academico 2026-2027. Si bo logra pasa e test di admision cu exito y completa e programa preparatorio bo por cuminsa cu bo estudio na augustus 2027.
Anochi di informacion
Dialuna dia 26 di october 2026 lo tin un anochi di informacion na IPA. Bo lo haya splicacion di kico 21+ Toets ta encera. Alabes lo elabora riba contenido y trata ehempel di tarea di diferente materia cu ta forma parti di 21+ Toets. E anochi di informacion ta di 7:00 pm – 8:30 pm y lo tuma na Sala Madonna di IPA (Isaac Wagemakerstraat 11, San Nicolas).
Inscripcion
Tur persona cu ta interesa pa haci 21+ Toets por inscribi via e website ipaaruba.com. Pa por inscribi mester cumpli cu e pago di AWG 100,- y pone como anexo copia di comprobante di pago den formulario digital di inscripcion. Tene na cuenta cu e comprobante mester tin bo nomber riba dje, p’asina nos sa na ken e pago ta pertenece. E ultimo dia pa inscribi pa 21+ Toets ta 18 di januari 2027. Despues di e
fecha aki no tin posibilidad mas pa inscribi.
Pa keda altanto di e ultimo desaroyonan di IPA bishita ipaaruba.com y sigui nos riba pagina di facebook Instituto Pedagogico Arubano.
Info / Contact
Pa mas informacion por busca den e alfabet menu riba nos pagina principal:
Por tuma contacto cu:
Scroll To Top