Search Facebook Instagram Twitter

Investigacion: Con ta bay cu calidad di bida di hobennan na Aruba

December 2, 2020

Cu hopi orguyo y satisfaccion e team di IPA lidera dor di Dr. Paula Kibbelaar a presenta e rapport di e investigacion piloto haci riba e bienestar di hobennan den nos comunidad.

E estudio aki a wordo haci na aña 2019 bou di 11 scol na Aruba di cua mayoria tabata scol basico y 1 scol pa ofishi (SPO).

Mas o menos 900 mucha a participa na e investigacion aki door di yena un encuesta. E encuesta a trata e topiconan: scol, bario, situacion na cas, idioma y salud. Banda di esaki a entrevista 50 funcionario di e team di cuido di scol, maestronan y directornan di scol. E directivanan di SKOA, SPCOA y DPS tambe a wordo entrevista.

E datonan a wordo procesa door di CBS di Aruba y analisa door di Dr. Kibbelaar conhuntamente cu investigadornan di Vrije Univeriteit di Amsterdam.


Obhetivo

E investigacion aki tin como obhetivo pa contribui na e Plan Strategico Nacional (NSP), e raport di Caft, e acuerdo di coalicion (MEP, POR, RED), e Plan Educacion Nacional (PEN 2030), tratadonan di Nacionan Uni pa cu Desaroyo Sostenibel (SDG number 3, number 4 y number 5) y por ultimo e ‘Plan di Crisis Social’ (SCP).

Banda di datonan interesante, e investigacion a desaroya un instrumento di autoinforme cu por yuda pa monitor e calidad di bida di hobennan di Aruba pa tempo largo den scol primario y secundario.

A base di e datonan colecta por desaroya strategianan pa promove salud y bienestar di hobennan riba nos isla y evita comportacion riesgoso.


Conclusion general

Di e resultadonan di e estudio por formula algun conclusion general:

  1. Tin indicacion cu hopi mucha na Aruba ta funciona rasonabelmente bon den nos comunidad;
  2. Mayoria di e muchanan a informa cu nan ta mira nan mes como mucha feliz, cu no tin mucho preocupacion y mayoria di e muchanan no ta menciona cu nan tin di haber cu  comportacion problematico manera pelea y termento/bullying;
  3. Di esnan cu si ta encontra cu comportacion problematico, esaki ta cuminsa na un edad relativamente hoben (pre-adolescencia) e grupo aki mester monitor mas di cerca;
  4. Si mira mas den profundidad, por mira cu un porcentahe halto (30%) di mucha cu ta den e ultimo añanan di scol primario, a tuma un caminda den scol primario mas largo cu ta previsto.
  5. Na nivel di factor individual di mucha, mita di e muchanan a raporta un nivel abou di autocontrol;
  6. Un cantidad considerabel di mucha a raporta un estilo di bida poco saludabel (40%);
  7. Mayoria di mucha a raporta un autoimagen positivo (74%);
  8. Na nivel familiar, ta mustra cu mayoria di e muchanan tin un perspectiva positivo di comportacion di nan mayornan (85%) y  e relacion cu nan mayornan (77%);
  9. Na nivel escolar, mayoria di e muchanan (72%) a indica di ta satisfecho cu nan resultadonan di scol y nan relacion cu e maestro;
  10. Tambe nan a informa di tin un vision positivo di comportacion di nan amigonan y e relacion cu nan;
  11. Un cantidad preocupante di mucha (66%) a informa cu nan ta sinti insigur den nan bario.

Recomendacion

E recomendacionnan di e estudio aki ta pa:

  1. Sigui haci e estudionan di monitor pero riba un grupo mas amplio di mucha, pa loke ta trata caracteristica di mucha, famia, scol, amigo y bario den relacion cu bienestar;
  2. Monitor caracteristica di tur mucha, famia, scol, amigo y bario den relacion cu comportacion antisocial y posiblemente di delincuencia;
  3. Monitor specificamente e muchanan cu ta cuminsa klas 5 uzando e encuesta recientemente desaroya y ripitie cada dos aña te ora cu nan caba scol secundario;
  4. Desaroya herment pa mehora e autocontrol cerca e muchanan pa mehora nan concentracion y atencion;
  5. Mehora relacion familiar saludabel, locual ta specialmente importante pa mucha muher;
  6. Mehora posibilidad pa e maestronan presta atencion na e alumnonan di forma individual (door di recruta asistente den klas), specialmente pa esnan cu ta den riesgo di desaroya un comportacion antisocial y/of desaroya problema di humor.
  7. Continua cu enfoke riba e relacion entre idioma materno y e idioma di instruccion na scol;
  8. Mehora comportacion relaciona cu salud:
  9. Ofrece sosten accesibel pa mayornan;
  10. Stimula participacion di mayor na scol;
  11. Aumenta seguridad di bario pa aumenta bienestar y posibilidad, specialmente pa mucha muhe por expande nan ambiente social di un manera sigur.

Download

Pa mas informacion di e investigacion por lesa e rapport como tambe un resumen na Papiamento, Ingles y Hulandes aki:



Dr. Paula Kibbelaar a entrega e rapport na Minister di Enseñansa, Ciencia y Desaroyo Sostenibel, Armando Lampe, cu a pidi pa e investigacion aki wordo haci y a percura pa e sosten pa esaki. Tambe Dr. Kibbelaar a duna diferente presentacion tocante e resultadonan na Departamentonan di Gobierno, instancianan no gubernamental y directivanan di scol. Despues di e presentacionnan participantenan a discuti riba e relacion entre trabounan cu ta wordo haci den comunidad y den scolnan y e importancia di cu e instancianan ta traha mas cerca di otro y hunto pa bienestar di nos hobennan.

Mirando e efectonan negativo cu COVID-19 por tin riba calidad di bida den diferente hogar, ta mas importante ainda pa sigui monitor di cerca e desaroyo di e muchanan na Aruba.


Info / Contact

Instituto Pedagogico Arubano (IPA)

Scroll To Top
  • © 2011-2021 Department of Education Aruba (DEA)
  • T +297-528-3400
  • F +297-528-3434
  • info@ea.aw

By orbitalnets