Informacion di Registro Civil y Censo pa studiante cu ta bay biba afo
Un di e asuntonan cu mester regla prome cu bo por bay studia afo ta pa kita bo nomber (schrijf uit) for di e Registro di Populacion (bevolkingsregister). Esaki ta conta pa TUR studiante cu ta bay biba afo.
Ley
Segun e ley di e Registro di Populacion, e populacion ta consisti di solamente personanan cu di berdad ta biba na Aruba. Tur otro hende cu NO ta biba akinan (entre otro pa estudio), ta obliga pa kita nan nomber (schrijf uit). Acaso si un hende no haci esaki e lo por wordo kita automaticamente.
Studiantenan cu ta bay Hulanda
Si bo kier bay studia na Hulanda, bo mester inscribi bo mes na e municipio (gemeente) cu bo ta bay biba na Hulanda. Aki lo duna algun tips pa haci e inscripcion na Hulanda mas facil.
Cita pa “schrijf uit”
Riba Censo su peticion nos a ricibi dia 9 di juli 2022 for di Afdeling Studiefaciliteiten di Directie Onderwijs tur email di studiantenan cu ta bayendo Hulanda. Door cu esaki ta un grupo grandi, cada un di e studiantenan aki lo ricibi un email di Censo cu un orario specifico pa presenta diaranson dia 27 di juli 2022 entre 13:00 or y 16:00 or pa por schrijf uit.
Otro studiantenan por haci un cita pa schrijf uit via e website di Censo:
Studiante cu a caba di pasa examen rijbewijs
Prome cu bo schrijf uit di Registro di Populacion, ta importante pa bo saca bo rijbewijs. Ora di bo cita pa traha bo carchi di rijbewijs, bo mester acudi na Censo cu un identificacion (valido) y e potret lo wordo saca na Censo mes. Pa mas informacion:
Kita bo nomber for di e Registro di Populacion (bevolkingsregister)
Prome cu bo biaha pa Hulanda, bo mester kita bo nomber (schrijf uit) for di e Registro di Populacion (bevolkingsregister). Esaki ta un condicion necesario pa bo por inscribi bo mes na Hulanda. Un di e documentonan cu bo tin cu entrega ora bo ta bay inscribi bo mes na Hulanda ta e prueba di kitamento di bo nomber (uitschrijvingsbewijs). E prueba aki bo ta ricibi na momento cu bo kita bo nomber for di e bevolkingsregister na Aruba.
Ora di schrijf uit, ta importante pa bo indica na Censo na cua municipio bo ta bay biba na Hulanda. Esaki por diferencia di e municipio na unda bo ta bay studia. Ora di establece bo mes na Hulanda, bo lo inscribi bo mes na e municipio cu bo a indica na Censo cu bo ta bay biba. Si bo no haci esaki, bo lo por haya problema ora di inscribi na Hulanda.
Si bo dicidi pa inscribi bo mes na un otro municipio cu esun cu bo a indica na Censo, esaki por trece cun’e cu e inscripcion na Hulanda por tarda, cu consecuencia cu lo bo por haya bo number di servicio civil (na hulandes: burgerservicenummer (BSN) mas laat.
Inscripcion den Basisregistratie Personen (BRP)
Ta recomendabel pa bo busca informacion adelanta, por ehempel riba e website di e municipio, tocante con e inscripcion den BRP ta regla na e municipio. Por ehempel, si mester traha un cita of cual ta e documentonan cu bo mester entrega na e momento cu bo ta bay inscribi bo mes. Tin municipionan caminda tin dianan fiho of citanan specialmente pa locual ta inscripcion den BRP di studiantenan cu ta bin for di Caribe.
Na momento cu bo ta bay inscribi bo mes den BRP na un municipio bo mester entrega e siguiente documentonan:
- Paspoort (pa nan por establece bo identidad);
- Comprobante di mudansa (uitschrijvingsbewijs) ricibi for di Censo ora bo a schrijf uit;
- Comprobante di e direccion na Hulanda (por ehempel un copia di e contrato di huur of un carta firma y un copia di e cedula di e miembro di famia cu ta declara cu por lo pronto bo por biba na su cas);
- Acta di nacemento (afschrift van geboorteakte).
Tuma nota: si bo no a nace na Aruba, ta bon pa bo aplica pa un acta di nacemento na tempo for di e pais unda bo a nace y si no ta parti di Reino mester laga traduci esaki (si ta necesario) y laga legalisa esaki (si ta necesario) of laga pone un apostille riba esaki. Pa mas informacion riba e tema aki, por wak riba e website di cada municipio na Hulanda.
Punto di contacto na Aruba
Si tin pregunta tocante e informacion aki y/of bo a haya un problema cu bo inscripcion na Hulanda, entre otro pa falta di documento, por mail Censo na info@censo.aw.
Tambe por haya e e-mails di Censo su team bou ‘contacts’ riba e website di Censo www.censo.aw.
Info / Contact
Pa mas informacion relaciona cu Arubalening por busca den e alfabet menu riba nos pagina principal:
Pa preguntanan relaciona cu Arubalening:
- Email: arubalening@ea.aw
- Whatsapp: 594-4140
- Yama: 528 3400 y puntra pa seccion Studiefaciliteiten
Sigui nos via e social media pages:
- DEA facebook: @educationaruba
- DEA instagram: @educationaruba
