Grupo grandi di studiante a sali pa Hulanda
Dia prome (1) di augustus 2023 e di dos grupo di studiante di Aruba a sali pa Hulanda pa sigi un estudio avansa na nivel di HBO of Universidad.
Na aeropuerto e studiantenan a wordo ricibi pa director di Departamento di Enseñansa Aruba (DEA) hunto cu e team di seccion Studiefaciliteiten cu ta encarga cu Arubalening.
Cu un bunita y alentador speech di Minster Sr. Tjon como tambe di Sra. Croes-Dubero, e studiantenan a subi vuelo pa Hulanda. Personal di Departamento di Enseñansa Aruba (DEA) ta desea cada studiante hopi exito, enfoca riba boso meta y cu trabou duru y hopi dedicacion boso lo logra sigur!
Ta gradici e ekipo completo di Aeropuerto y AAA pa e tremendo organisacion special pa nos studiantenan. Cada studiante a ricibi un regalito hopi util na nan salida pa Hulanda. Den nomber di nos studiantenan, masha danki!
Riba nos pagina di Facebook @EducationAruba por wak potret y video di e salida di e studiantenan pa Hulanda.
Minister di Enseñansa (Croes) ta desea tur cu ta bay continua cu estudio avansa hopi exito
Minister di Enseñansa y Deporte Endy Croes ta desea tur studiante cu a bay Hulanda y den region hopi exito cu nan estudio. Diasabra ultimo, e prome grupo cu ta consisti di 24 studiante a yega Hulanda y a wordo ricibi pa Minister Plenipotenciario na Hulanda, mr. Ady Thijsen y director ad interim di Arubahuis, drs. Glenda Hernandez. Tambe tabata presente na nan yegada, e representantenan di Departamento di Enseñansa di Arubahuis, “studiementor” y e miembronan di e “Plaatselijke Opvangcommissie” (POC) cu lo guia e studiantenan durante e prome dianan na Hulanda.
Prome di augustus e grupo mas grandi a sali pa Hulanda, cual ta consisti di 100 studiante. Director di Departamento di Enseñansa Aruba (DEA), Sra. Anne-Marie Proveyer y su team tabata presente na Aeropuerto Internacional Reina Beatrix pa despedi di nos studiantenan. Minister Endy Croes ta encurasha tur studiante pa haci nan maximo esfuerso pa logra nan meta. Esaki ta un etapa cu no ta facil, mirando cu e studiantenan ta bay leu di cas y ta confronta cu diferente reto durante nan estudio den exterior, pero cu hopi perserverancia y determinacion ta logra. E mandatario di Enseñansa ta conseha tur studiante pa aplica e cuater (4) C-nan di habilidad di siglo 21 pa tin exito durante nan estudio, cual ta para pa comunicacion, colaboracion, pensamento critico (critical thinking) y creatividad. Minister Endy Croes ta gradici directora di DEA, Sra. Anne-Marie Proveyer y su team cu a traha hopi duro pa e biahe di e studiantenan. Finalmente, Minister Endy Croes ta desea cu nan por termina nan estudio exitosamente y pa bolbe bek pronto pa contribui den e desaroyo di Pais Aruba.
