Search Facebook Instagram Twitter

Gobierno ta aproba cambionan importante den Arubalening

February 17, 2017

Minister Hooyboer-Winklaar ta sumamente contento di por anuncia cu recientemente Conseho di Minister a aproba un nota di maneho entrega, cu ta inclui cambionan den rente, e periodo pa paga e lening bek y un aumento di e suma maximo di Arubalening pa Merca y Canada.

 

E decision aki ta den cuadro di e maneho di gobierno pa stimula mas estudio na nivel superior, y pa haci studia den region, specificamente Merca y Canada, mas accesibel pa nos studiantenan di Aruba.

Minister di Enseñansa Michelle Hooyboer-Winklaar ta menciona cu tin un interes y necesidad grandi pa opcionnan di estudio na Merca y Canada.

Nos kier crea mas opcion pa nos hobennan y ta haye di suma importancia pa crea e condicionnan necesario pa tur studiante por logra nan meta na e pais y instituto di nan preferencia e mandatario ta enfatisa.

Segun e Minister hunto cu esaki e ta importante pa keda duna tur informacion relevante pa asina studiantenan por ta bon informa y por haci nan escogencia na un manera responsabel. 

 

Suma maximo

E titular di enseñansa a formalisa varios acuerdo importante den e ultimo 3 añanan cu institutonan Mericano y Canades pa asina logra beneficionan financiero pa studiantenan di Aruba unda cu ta baha e gastonan di estudio considerabelmente.

No obstante esaki a constata cu e suma maximo di Arubalening, compara cu DUO lening di Hulanda, ainda no ta cubri tur e gastonan envolvi. Mientras cu tin un grupo grandi cu kier considera e opcion di studia na Merca y Canada e parti di financiamento a keda forma un drempel pa studiantenan y mayornan scoge pa e opcion di estudio aki.

Actualmente e suma maximo di Arubalening pa Merca y Canada ta Afl.102.000,- y awo cu e aumento cu a keda aproba e suma maximo nobo ta bira Afl. 140.000,-. E ahustacion aki lo ta na vigor entrante di aña academico 2017-2018 y ta conta pa tur studiante cu a aplica caba of ta bai aplica pa Arubalening pa bay studia na e paisnan menciona desde e aña academico nobo.

E ahustacion ta valido tambe pa tur studiante existente cu actualmente ta na Merca of Canada y cu lo kier bin na remarca pa e suma maximo nobo.

Segun e calculacionnan e suma maximo nobo di Arubalening pa Merca y Canada ta yega awo mas cerca di e gastonan total pa biba y studia na e institutonan na Merca y Canada cu Gobierno di Aruba tin areglo di in-state tuition of areglonan di descuento of scholarships special.

Minister Hooyboer-Winklaar ta menciona cu e decision di e aumento mester a bay na un manera responsabel mirando cu no kier a hisa e suma sin mas, paso e ta importante pa tene na cuenta e suma cu mester paga bek na debe di estudio.

 

Interes y termino di pago

Segun Minister Hooyboer-Winklaar Nos kier haci studia afo mas accesibel pa tur studiante cu tin e ambicion aki y alavez alivia e peso pa e mayornan, pero nos kier evita cu despues e peso mester cay riba e studiante unabez e finalisa su estudio.

Mirando esaki e proposicion di e titular di enseñansa tabata pa baha e porcentahe di interes di estudio pa tur studiante cu un Arubalening na 2% di interes y pa hisa e tempo maximo pa pago di debe di estudio di 15 aña pa 20 aña. Tur esaki pa reduci e debe di estudio pa nos studiantenan y pa duna nos studiantenan mas espacio pa cumpli cu e pago di debe di estudio unabez nan cuminsa traha.

 

E mandatario ta confirma cu e proposicion aki tambe a keda aproba y a conta cu sosten completo di Conseho di Minister.

Minister Hooyboer-Winklaar ta sumamente contento cu un otro logro mas na beneficio di nos studiantenan y ta convenci cu tur e cambionan aki na final di dia no solamente lo tin un impacto positivo pa nos studiantenan pero tambe pa e posicion social economico di nos pais.

 

Ta sugeri pa studiantenan acudi regularmente na nos website ea.aw como tambe sigui Departamento di Enseñansa via facebook na @educationaruba.

 


Info / Contact

Pa mas informacion por busca den e alfabet menu riba homapage: [A] Arubalening of por tuma contacto cu DEA > seccion Studiafaciliteiten

Scroll To Top
  • © 2011-2023 Department of Education Aruba (DEA)
  • T +297-528-3400
  • F +297-528-3434
  • info@ea.aw

By orbitalnets