Festival di Buki pa Mucha 2025: Aventura na granel
Biblioteca Nacional Aruba (BNA) ta presenta Festival di Buki pa Mucha 2025. Un proyecto cu ta consisti di hopi evento, bishita na scol y produccion di un buki special, tur pa stimula lesamento cerca mucha. E tema di e festival 2025 ta ‘Aventura na granel’.
E festival ta dura un siman largo. Biblioteca Nacional Aruba ta habri e festival cu un fiesta grandi cu ta tuma lugar diadomingo dia 2 di november pa 3or na Paseo Herencia Ballroom. Tur mucha y nan mayor ta bonbini!
Den e siman di dialuna dia 3 pa diabierna dia 7 di november autornan y ilustrador tanto di Aruba como for di Hulanda, Corsou y Boneiro ta bishita scol pa conta storia y papia tocante buki cu e muchanan den klas. Parti merdia (3or) nan lo ta na biblioteca.
Buki Special
Autor di buki pa mucha, Liliana Braamskamp-Erasmus, ta trece otro aventura pa mucha, hunto cu su colega ilustrador Danielle Schothorst. Titulo di e buki ta ‘Zap! Zap! Zzziennng!’. Produccion ta di Biblioteca Nacional Aruba y Levendig Uitgever. Esaki ta un buki pa tur mucha na Aruba, na dos idioma, Hulandes y Papiamento. Tur scol participante ta haya e buki regalo pa nan biblioteca. Tambe por haya e buki gratuitamente na tur libreria ora cumpra un buki pa mucha, tanten cu tin den stock.
Info / Contact
Biblioteca Nacional Aruba (BNA)
Scroll To Top