Search Facebook Instagram Twitter

Exposicion di buki y competencia di skirbimento pa mucha

June 20, 2018

Recientemente Departamento di Enseñansa Aruba a participa na e “Feria di Papiamento” organisa pa Fundacion Lanta Papiamento. E feria tabata pa celebra e echo cu diescinco aña pasa, riba dia 21 di mei 2003, Gobierno di Aruba a acepta e decreto di ley di idioma oficial cu a haci Papiamento y Hulandes e idiomanan oficial di Aruba.


Exposicion

Durante e feria Departamento di Enseñansa a presenta un exposicion di material di Desaroyo di Curiculo como tambe un exposicion di buki literario y material di referencia na Papiamento.

Proyecto Idioma di Departamento di Enseñansa recientemente a publica 20 titulo di ficcion nobo na Papiamento pa nos muchanan y hobennan. Un grupo grandi di ‘freelancer’, principalmente local, pero tambe internacional a skirbi, traduci, ilustra y coregi e materialnan nobo. “Proyecto Idioma a percura pa coordinacion di e trabounan, redaccion y publicacion di e titulonan, y e rekisitonan pa financiamento di FDA.”

A selecta e temanan, teniendo cuenta cu cada grupo meta specifico.

Potret: 20 buki nobo na Papiamento

Algun ehempel di tema pa scol basico y special: amistad, termento (‘bullying’), proteccion di flora y fauna di Aruba, deporte / perseverancia y trahamento den team. Tema pa e hobennan ta inclui peer pressure, namoramento, bida social di hoben y e consecuencianan di embaraso hubenil / uzo di droga.

A traha e bukinan aki principalmente pa uzo na scol y cu grupo meta hopi varia den mente. Tin titulo pa klas 2 di scol basico te cu e klasnan di examen di scol secundario. E bukinan aki a wordo parti bou di tur scol.

Durante e Feria di Papiamento tabatin hopi interes pa e bukinan na Papiamento cu DEA a publica.

E bukinan no ta na benta den libreria, pero si ta obtenibel pa fia na Biblioteca Nacional y na tur MFA. Tambe ta trahando riba un proyecto cu e meta pa ofrece e bukinan den forma digital.


Competencia di skirbi

Banda di e exposicion di buki, DEA a organisa un competencia di skirbimento pa mucha. E muchanan por a scoge un titulo for di e serie nobo: “Club di Lesa Dushi Kids” y skirbi nan mesun storia basa riba e titulo.

Muchanan cu no por skirbi ainda por a conta nan storia y esaki a wordo skirbi pa nan. Tabatin 3 escritor di e serie di buki cu a guia e muchanan. Un total di 36 mucha di 4 pa 12 aña a participa.

Cada mucha cu a entrega un storia a ricibi un buki regalo. E muchanan mes por a scoge un buki y laga e escritor firm’e.


Ganado

Tabata basta dificil pa scoge e ganadonan pasobra e muchanan tin hopi fantasia y nan a skirbi storia tremendo! E siguiente muchanan a gana e Prome Premio: Ryuji van Koetsveld, Dylan Coutinho, Yatmiel Geerman y Naomi Arrindell.

A duna un cantidad di 7 mucha un Premio di Motivacion: Rory-Mei van Koetsveld, Loghan Steenvoorde, Nathan y Lisandra Balgobind, Jennyraine Maduro, Yoshua Flanegin y Gilmard Jansen.

E ganadonan di e Prome Premio a gana e set di 10 buki “Club di Lesa Dushi Kids”. Tur mucha a ricibi un certificado y nan por a scoge un buki pa lesa na nan gusto. Tambe nan por a hiba e “buki blauw” cu por uza pa busca con ta skirbi palabra na Papiamento.

DEA ta felicita e muchanan cu nan premio y ta spera cu nan lo sigui skirbi storia bunita!


Info / Contact

Pa mas informacion por busca  [L] Lesamento  of  [S] SAM den e alfabet menu riba homepage of por tuma contacto cu DEA > Proyecto Idioma

Scroll To Top
  • © 2011-2023 Department of Education Aruba (DEA)
  • T +297-528-3400
  • F +297-528-3434
  • info@ea.aw

By orbitalnets