Exitoso Feria di Educacion y Salud 2015
Hoben y mayor a mira cu tin hopi opcion na Aruba mes pa por sigui un estudio avansa. Esey tabata e intencion tambe di e Feria di Educacion y Salud 2015 organisa pa Universidad di Aruba (UA), Instituto Pedagogico Arubano (IPA) y Colegio EPI.
 |
Aria James di Colegio EPI y su colega studiantenan no por a kere e cantidad di interes cu tabatin pa e prome Feria di Educacion y Salud. James tabata entre e studiantenan di Colegio EPI encarga pa parti e foyetonan cu informacion di e feria. Un feria cu a brinda hobennan e oportunidad pa no solamente haya un chispa di e experiencia di un trabou militar, pero sigur haya un vision kico nan futuro profesional lo por ta.
 |
| Comision FES |
Mayornan cu a mira cu tin hopi opcion na Aruba mes pa nan yiunan por sigui cu nan estudio mas avansa. Esey tabata e intencion tambe di e feria organisa den fin di siman na YMCA San Nicolas.
E feria tabata organisa cu e meta pa informa comunidad di diferente estudio y curso cu Aruba pero tambe islanan ruman ta ofrece. No solamente institucionnan di educacion y profesional a haci uzo di oportunidad pa expone nan producto, pero alumnonan hoben, nan mayornan y hasta adultonan cu interes pa expande nan posibilidadnan di crece profesionalmente a haci bon uzo di e oportunidad.
 |
For di mainta trempan a cera e caminda dilanti YMCA pa asina Arumil y Cuerpo di Bombero por a pone nan ekiponan pa e demostracionnan cu a resulta masha popular.
 |
 |
E ekipo di K-9 di Cuerpo Policial tambe a haci un impacto cerca e hobennan particularmente.
 |
Den e tereno di YMCA mes diferente organisacion, for di Cuerpo Policial di Aruba te na Universidad di St. Maarten a ekipa nan kiosconan cu tur informacion posibel. Y e tabata necesario, pasobra particularmente den oranan di mainta y despues di merdia, e fluho di hende cu tabata bishita tur tabata constante y cu hopi gana di acumula mas informacion posibel.
Organisacion y institutonan cu a participa
E institutonan presente tabata University of Curaçao, University of St. Maarten, Xavier University di Aruba; Universidad di Aruba; Colegio EPI; Instituto Pedagogico Arubano; Avond Havo; Openbare Leergangen Aruba (Scol di Ofishi di Anochi); Departamento di Labor; Departamento di Enseñansa y Iberto American Highschool. Colegio San Nicolas, DOC Opleidingen, Seccion Studiefaciliteiten (Arubalening), Sociale Vormings Traject y e agencia di coaching y guia pa scoge carera basa riba talento Umoja tambe tabata presente.
 |
“Fiesta di informacion”
IMSAN y Wit Gele Kruis tambe a atende e feria, den e caso aki pa contribui na un control di salud. Tanto e hoben y esnan mas grandi tabata masha interesa pa e control aki cu particularmente IMSAN tabata ofrece. Wit Gele Kruis a enfoca pa duna informacion riba su campaña pa evita embaraso hubenil.
 |
Segun Teniente Moises Henriquez di Arumil, a dicidi pa participa na e Feria di Educacion y Salud pa sostene e evento, ya cu e organisacion cu e ta pertenece na dje ta para pa educacion, cu ta algo cu ta bon pa tur hoben. E cantidad di hoben cu a bishita e tent di Arumil tabata hopi, y un motibo por tabata e posibilidad pa haci algun di e ehercicionan cu ta rekeri pa militarnan keda den bon salud fisico. Arumil ta yen actualmente, y pa 2017 lo tin un klas nobo.
Ibero American Highschool tambe ta contento di por a participa na e evento, segun director adhunto Roxanne Robles. E scol di 300 alumno ta brinda un alternativa pa hobennan cu ta prefera di sigui nan estudio secundario den e idioma Ingles.
Frank Mulders di Avond Havo ta bisa cu e interes pa estudio secundario den oranan di anochi tambe ta creciendo y particularmente memey di hobennan. “E edad promedio di nos studiantenan ta di 22.4 aña”.
Colegio San Nicolas tambe tabata presente pa splica kico e scol ta ofrece. Segun decanonan Miguel Donatay Izaira van der Linden e scol ta di e mesun nivel cu Colegio Arubano. E unico diferencia ta cu Colegio San Nicolas ta ofrece un trayecto di HAVO den tres aña, comparabel cu E-klas cu ya no ta existi mas na Playa. “Mas ainda, nos scol ta costa 1000 florin pa atende, cu ta inclui e fondo di buki. Y e calidad di e diploma ta mescos”.
Alumno di Colegio San Nicolas Keanu Maduro di su banda a bishita su decanonan pa cuminda, pero su interes tabata pa mira su futuro y e oportunidad pa sigui na Universidad di Aruba ta uno cu e lo pensa riba dje sigur.
Studiante James di Colegio EPI a bisa cu tabata yamativo e cantidad di interes cu tabatin pa e programa di Salubridad y Servicio cu Colegio EPI ta ofrece, tanto di parti di alumnonan y nan mayornan. Docente Jubitza Thomson tabata contento cu e interes aki.
 |
Un y tur presente sigur tabata entreteni pa e unidad di cacho di polis, K-9. Segun Vocero Policial John Larmonie, “Mi ta kere cu e otro coleganan mester mira con pa bay competi cu e unidad aki”. Pero asina mes, Larmonie no a haya mucho oportunidad pa tuma un pausa mirando e interes grandi pa e posibilidadnan den e carera policial.
 |
Pa loke ta Enseñansa Superior, Universidad di Aruba siguramente tabata bon representa cu e staff di tur su facultadnan. Decano y docentenan presente tabata satisfecho cu e interes creciente pa e institucion academico Arubiano cu tur aña ta bira mas grandi. Y Studia na Aruba mes no ta nifica cu no tin oportunidad pa haya experiencia den exterior. Esnan cu a bishita e kiosconan di Universidad di Aruba a haya sa di e programa Erasmus plus cu ta permiti studiantenan di Aruba y tambe docentenan di e institucion pasa semesternan na universidadnan Europeo.
 |
Instituto Pedagogico Arubano (IPA), ademas di a co-organisa e evento, tabata presente cu un kiosco pa mustra kico tur ta ofrece den estudio pa docente. IPA ta educa docentenan pa traha na scolnan preparatoriote na scolnan secundario y mester bisa cu e interes di hoben y adulto pa e programanan di IPA tabata grandi, particularmente awor cu e institucion ta uno acredita.
 |
Esnan presente tambe a haya splicacion di e posibilidad pa Studia na Corsou y St. Maarten. Representantenan di e dos universidadnan regional aki ta kere cu nan institucion ta brinda studiantenan di Aruba un posibilidad amplio pa sigui un carera tecnico, den idioma y tambe den turismo. Mester bisa cu Arubianonan ta forma e grupo di studiante extranhero mas grandi na University of Curaçao, segun su representante Lydia Ras.
Yamativo tabata presencia di Omuja, cu ta brinda coaching y ta guia hobennan pa haya nan rumbo profesional/educativo basa riba nan talentonan. Omuja ta un agencia di Kevin Richardson kende a bisa cu e enfoke ta “pa yuda hobennan cu no sa kico pa haci, realmente sa kico nan propio talento ta y bay dilanti basa riba esaki”.
 |
Minister di Enseñansa Michelle Hooyboer Winklaar tabata presente y a aplaudi e iniciativa di e institutonan cu a organisa e Feria di Educacion y Salud. “E ta bunita pa mira con diferente instancia ta bin hunto pa un evento asina importante” minister Hooyboer Winklaar a bisa, gradiciendo e organisadonan pa pensa riba henter e comunidad ora di a hinca e programa den otro.
 |
Augustinus College
Mester bisa cu particularmente Augustinus College a percura cu tur su alumnonan di e di dos aña di MAVOatende e feria, ya cu e ta brinda nan un perspectiva kico nan por scoge pa futuro. E tarea di e alumnonan tabata pa traha un reportahe di e feria. E organisadonan tabata contento cu e iniciativa di e scol, y ta spera cu den futuro, otro scolnan tambe mira e balor di un feria informativo asina. No solamente e ta yuda tur hende pensa riba futuro, e ta ofrece hermentnan crucial ora di scoge e rumbo na scol pa yega na metanan specifico.
E evento no lo ta posibel sin ayudo di tur e boluntario y tur esnan cu a yuda cu donacion. E comision di FES ta gradici un y tur cu a contribui na e evento aki.
 |
 |
 |
 |
 |
 |
Info | Contact
Pa mas informacion por busca den e alfabet menu riba homepage [S] Studia na Aruba of [S] Studia na Corsou of por tuma contacto cu: IPA, UA of Colegio EPI.
Scroll To Top
