Enseñansa pa Empleo ta habri inscripcion pa aña 2022
Minister di Labor (Glenbert Croes) recientemente a anuncia cu Enseñansa pa Empleo (EPE) ta habri inscripcion pa curso den e prome periodo di 2022.
Enseñansa pa Empleo ta ofrece un variedad grandi di curso di e.o. diferente idioma y Office Skills, Boekhouden, Waiter, Bartender te cu Sales & Marketing.
A opta pa mantene e tarifanan socialisa pa asina e por ta accesibel y pues pagabel pa tur hende.
Lista di tur e cursonan como tambe e tarifanan ta publica riba e website di Enseñansa pa Empleo den e seccion di “Rooster di Curso EPE”:
Inscripcion
Inscripcion ta bay online via e website di Enseñansa pa Empleo (EPE):
Enseñansa pa Empleo tin comprension pa esnan cu pa un of otro motibo no tin acceso na computer y/of internet pa haci e inscripcion online, pa cual motibo ta brinda e oportunidad pa inscribi personalmente na oficina di EPE. Orario pa inscripcion personal ta entre 8:30 – 11:30 di mainta y 13:00 – 16:00 di atardi na e oficina di EPE situa na Engelandstraat 33.
E ultimo dia pa inscribi ta 31 di januari 2022. Cursonan lo cuminsa den e prome siman di februari.
Historia breve di EPE
Enseñansa pa Empleo (EPE) a wordo funda na aña 1988. Despues cu Lago a cera su portanan na 1985, hopi hende a perde trabou y Gobierno di Aruba e tempo ey a busca un alternativa pa Aruba su economia na unda e industria di hotelero y turismo a forma y a crea oportunidad pa trabou. Gobierno a bin cu e proyecto pa “her- en bijscholing” di e hendenan cu no tabatin trabou, haya curso pa un ofishi nobo, entre otro den construccion y den e sector hotelero. Asina Enseñansa pa Empleo a nace y a bira e centro di enseñansa desde e tempo ey cu ta ofrece curso cu por uza den e mercado laboral.
“Aruba Kier Traha”
Den reparticion di cartera pa Gabinete Wever Croes II, Enseñansa pa Empleo a bin resorta bek bou di Ministerio di Labor. Durante Gabinete Wever Croes I el a resorta bou di Ministerio di Enseñansa. Minister Glenbert Croes ta contento cu e departamento aki ta bek bou di Ministerio di Labor, specialmente den cuadro di “Aruba Kier Traha” cu ta e plataforma encarga cu recapacitacion di nos hendenan cu tabata riba FASE. Na mes momento Aruba Kier Traha ta e puente di comunicacion entre gremionan y departamentonan di Gobierno pa sigura cu e cursonan duna, ta cumpli cu e demanda Laboral, pa DPL na su turno yuda nos hendenan cu un trabou.
Info / Contact
Por tuma contacto:
Pa mas informacion por busca den e alfabet menu riba homepage:
Scroll To Top
