Edificio nobo pa Prinses Amalia Basisschool den fase final
Minister di Enseñansa, Michelle Hooyboer-Winklaar a tene un recorido na e edificio nobo di Prinses Amalia Basisshool pa mira e ultimo desaroyonan di e trabounan.
 |
A premira cu e scol lo bay ta completamente cla na luna di juli. Tin un inversion di mas o menos 6 miyon florin y awo ta den e fase pa por otorga.
“Nos ta hopi contento pa por mira e producto final. Un scol completamente hopi moderno, amplio y di tin tur loke un scol mester tin. Mi ta hopi contento p’e scol Prinses Amalia pa por haya un ambiente asina aki“, asina Minister Hooyboer-Winklaar a remarca.
 |
Prinses Amalia ta un scol cu merece esaki, pero mescos cu tur otro scol cu merece di ta den edificionan cu ta completamente adecua pa duna un calidad di enseñansa. Esey ta locual nan a boga pe y den e ultimo 8 aña trahando duro pa por yega eynan. Ministerio di Enseñansa ta sumamente contento di por a ricibi un recorido. Nan ta premira cu e cantidad di mas o menos 320 alumno na Prinses Amalia lo bay keda mas o mesun mescos.
 |
Desde aña pasa a inicia cu e trabounan pe edificio nobo pa Prinses Amalia Basisschool y a keda basta consecuente cu e tempo di trabou aunke cu tabata tin un temporada di hopi awasero y esey a tarda un tiki. “Pero nos ta mirando cu e ta rond di e fechanan cu nan a stipula caba. Nan lo bay ta cla pa un aña escolar nobo den un edificio nobo”, asina Minister Hooyboer-Winklaar a remarca.
 |
Prinses Amalia Basisschool ta existi pa 5 aña y ta bayendo pa 6 aña di existencia. Nan tabata un “dependance” di Reina Beatrix School y semper nan a keda den e edificio bieu, cabesante di Prinses Amalia Basisschool, Roelien Hofman a remarca. Cabesante di e scol basico ta haya esaki hopi bunita y a mira desde comienso con esaki a crece y e luga ta uno hopi trankil y fresco. “Mi ta hopi contento cun’e“, asina Roelien Hofman a expresa.
Info / Contact
Pa mas informacion por busca den e alfabet menu riba homepage: [F] Faciliteiten of [O] Onderhoud Scholen.
Scroll To Top
