Diferente acuerdo entre Aruba y Stenden University
Minister di Turismo (Oduber) hunto cu e Dean di Universidad di Aruba (UA) a reuni cu e grupo academico di NHL Stenden University of Applied Sciences tocante e introducion di nan curiculo nobo “Tourism in transition”.
NHL Stenden ta scoge Aruba como un pais nobo di nan “Grand Tour” program pa asina brida studiante nan di UA oportunidadnan unico pa explora perspectivanan innovativo den e area di turismo sostinibel. Recientemente NHL Stenden oficialmente a firma un acuerdo cu Universidad di Aruba unda lo brinda e curriculum nobo aki p’e studiantenan cu ta atende e universidad. E prome piloto lo cuminsa na luna di September 2024.
E beneficio di e colaboracion aki ta cu Aruba lo bira un pais unda e studiantenan por experiencia “exchange program”. Tin mas pais manera Bali, Italia, Sur Afrika y mas cu tambe ta ofrece e programa aki di Stenden. Posibilidadnan pa sigui e curiculo aki pa otro facultad di UA tambe lo ta posibel, manera pa FEF y OGM. Aruba lo no solamente ricibi studiantenan di Hulanda, sino tambe studiantenan internacional cu lo ta studiando na Stenden University.
Minister Dangui Oduber ta gradici Universidad di Aruba y NHL Stenden p’e bishita y ta aplaudi y sostene e curiculo nobo aki p’e studiantenan. Desaroyo pa un turismo sostenibel ta di hopi importancia p’e Ministerio di Turismo, y pa es motibo ta sostene pa incorpora e ciruculo aki na UA.
Fuente
MoU entre Aruba y Stenden University
Dialuna 11 di maart 2024 tabata tin un encuentro entre representantenan di Stenden University di Hulanda y Minister di Enseñansa (Croes) y Minister di Asuntonan Economico (Wever).
E Ministerio di Asuntonan Economico y e Ministerio di Educacion a uni forsa cu e universidad pa lansa un programa di intercambio di studiante universitario for di Hulanda. E Memorandum of Understanding (MoU), ta traha e caminda pa studiantenan di Stenden University bin biba y studia na Aruba. “Nos ta buscando pa duna mas bida na nos centro di ciudad, y cu un intercambio di studiantenan manera esun aki, nos centro ta bira un luga unda educacion y diferente cultura ta encontra y convivi,” Minister Geoffrey Wever a menciona, sperando cu esaki lo yuda mas aun trece mas movecion y energia den curason di Oranjestad.
Gobierno di Aruba recientemente a inicia e proceso pa transforma e ex-edificio di Ministerio Publico (OM) den Oranjestad den un compleho di apartamento pa studiante, como parti di diferente iniciativanan di Minister Wever pa revitalisa e centro di Oranjestad. Parti di e vision di Minister Geoffrey Wever ta pa mas hende cuminsa biba den centro di Oranjestad y pa edificionan bandona wordo renoba, especialmente cu destino pa studiante. “Nos kier trece mas hende biba den centro, e MoU ta a reitera e vision aki”.
