Dia di Informacion na UA
Universidad di Aruba (UA) ta invita studiantenan di Colegio Arubano, International School of Aruba, avond HAVO/VWO, EPI y tur cu ta interesa pa inicia un estudio di enseñansa avansa na Aruba, pa asisti na e mainta di informacion diasabra 9 di november proximo.
Riba e dia aki lo duna informacion di e Facultad di Derecho (Faculteit der Rechtsgeleerdheid – FdR), Facultad Financiero Economico (Financieel Economische Faculteit – FEF), Facultad di Turismo y Maneho (Faculty of Hospitality and Tourism Management Studies – FHTMS), Facultad di Arte y Ciencia (Faculty of Arts & Science – FAS) y SISSTEM cual ta nos programa nobo cu a cuminsa e aña aki na augustus 2019.
Riba e dia aki tur studiante cu ta interesa pa studia na Universidad di Aruba, e proximo aña academico tin oportunidad tambe pa haya informacion general y lo tin oportunidad pa papia cu studiante y docente di e facultadnan.
Cu orguyo nos por bisa cu Universidad di Aruba tin cuater (4) facultad cu diesun (11) programa y un aña di preparacion, e “Academic Foundation Year”.
Nos programa mas nobo ta SISSTEM, “Sustainable Island solutions through science, technology, Engineering and Mathematics”.
E estudio aki lo ta den cooperacion cu KU Leuven (Belgica), University of the West Indies (Jamaica) y Oregon University (USA). Un isla cu tin un solucion sostenibel por medio di ciencia, tecnologia, engeneria y matematica lo incorpora polisanan sostenibel riba un nivel academico. Asina por duna sosten na tur luga chikito y na mesun momento educa e sector laboral cu tin e capacidad y habilidad pa haci e polisanan aki un realidad.
Nos ta brinda e graduadonan di scol secundario y otro interesado e oportunidad pa por aplica y asina sigui un estudio pa obtene un titulo na nivel di ‘Bachelor’ of ‘Master’.
Universidad di Aruba tin un relacion estrecho cu diferente Universidad/Hogeschool Hulandes, Universidad Mericano y cu otro universidadnan acredita den region. Como studiante di Universidad di Aruba no solamente bo por haci un programa di intercambio pero tambe bo por bay haci bo pasantia (stage) afo. Pa esaki tambe nos tin acuerdo cu Universidadnan di Hulanda y Merca pa yuda supervisa y guia nos studiantenan cu opta pa haci esaki.
E convenionan cu Universidad di Aruba ta cera cu universidad reconoci mundialmente ta na bienestar di tur nos studiantenan.
Bo futuro ta den bo man!
Universidad di Aruba kier a invita un y tur cu ta interesa pa pasa e mainta aki pa haya tur informacion necesario pa asina por haci un bon escogencia pa futuro.
Mayornan cu tin yiu na scol secundario tambe ta bonbini pa haya sa mas tocante e estudio cu nan yiu ta desea di haci y asina por yud’e scoge e pakete adecuado na scol secundario. Cu un bon pakete esaki lo facilita e admision na un di e facultadnan mas lihe. E mainta aki lo tin hopi informacion valioso cu lo wordo duna y pesey mes ta importante pa atende e dia aki pa asina por tuma un decision corecto tocante bo futuro!
Studiante, staff y personal di Universidad di Aruba ta invita tur esnan cu ta interesa of no sa ainda kico nan kier studia pa join e Dia di Informacion diasabra dia 9 di november 2019, di 9:30 di mainta pa 1:00 di merdia, pa asina haya tur informacion di kico tur bo por haci aki mes na Aruba!
Pa mas informacion por yama 526-2200 of manda un email na osa@ua.aw. Tambe por bishita website [ua.aw] y/of e Facebook page of Instagram di UA.
Info / Contact
Pa mas informacion por busca [U] University of Aruba den e alfabet menu riba homepage of tuma contacto directo cu UA.
Scroll To Top
