Conferencia di prensa: “Nos ta tuma SDG-4 como e compas”
Dialuna dia 27 di september 2021, Minister Endy Croes, e minister encarga cu enseñansa, a duna su prome conferencia di prensa na unda el a indica di lo tuma e Sustainable Development Goal nr. 4, “SDG-4”, como e compas. E obhetivonan di SDG-4 ta pa logra enseñansa inclusivo, di calidad y pa tur hende.
Recientemente mundo a celebra e di 6 aniverasio di e metanan di desaroyo sostenibel “Sustainable Development Goals” (SDGs). Minister Croes a felicita e comision di SDG Aruba cu lansamento di nan campaña di conscientisacion.
SDG ta encera un total di 17 meta stipula como guia pa yega na e nivel di prosperidad y paz mundial. E metanan aki ta consisti di 5 pilar: e Ser Humano, Planeta, Prosperidad, Paz y Colaboracion. Pues e SDGs ta forma un compas y ta duna direccion pa por yega na un comunidad y un Pais mas resiliente. E meta di SDG number 4 ta para pa “Enseñansa inclusivo y di calidad pa un y tur”.
Minister Croes a splica cu pa e maneho di Ministerio di Enseñansa lo haci uzo di SDG 4 como e compas cu lo dirigi su maneho pa yega na solucionnan y mehoracion den enseñansa di nos pais. “Enseñansa ta un di e motornan mas poderoso cu ta comproba cu ta garantisa desaroyo y sostenibilidad. Mi kier pa nos corda y mantene SDG 4 como e compas di awo pa dilanti”, Minister Croes a enfatisa. Pa conclui, Minister Croes a bisa cu e lo percura pa trece tur stakeholder na mesa pa traha hunto y pa hunto wak den mesun direccion pa finalmente por logra e metanan stipula.
Por wak e Conferencia di Prensa di dia 27 di september 2021 aki:
Fuente: facebook.com/GabineteWeverCroes
Info / Contact
Pa mas informacion:
Pa informacion di contacto:
Scroll To Top
