Search Facebook Instagram Twitter

Colegio San Hose ta prome scol pa ricibi capa pa proteha asfalt

October 27, 2016

Asfalt di plenchi di hopi scol rond Aruba ta deteriora y pa pone un capa nobo ta costa hopi placa. Ademas e proceso ta tuma basta tempo.

Durante di planning pa pone capa di asfalt nobo na diferente scol, Ministerio di Enseñansa, trahando hunto cu DOW, a introduci un producto nobo for di Merca, cual por uza manera un “sunblock” pa yuda proteha e asfalt existente of e plenchi asfalta recientemente. E producto aki ta manera un “emulsie” cu ta basha riba e asfalt, provee pa e agencia local Johnson’s Services.

Minister di EnseñansaMichelle Hooyboer-Winklaar tabata presente durante di e prome test haci cu e “emulsie”. E proceso a tuma luga na Colegio San Hose. E mandatario a splica cu e scolnan na Aruba tin nan edad y mayoria falta mantencion durante e ultimo decadanan; no ta e edificionan so ta deteriora, pero e infrastructura completo, incluyendo e plenchinan di asfalt pa hunga mester di atencion y fondonan pa pone nan bek den bon condicion.

E plenchinan cu ta 30/40/50 aña bieu y deteriora ta hunga un rol grandi pa cu e bienestar di e muchanan, como cu nan ta kibra y ta forma peliger pa e alumnonan. E “laag” nobo di “emulsie” ta pa yuda extende e bida di e asfalt cu ta poni caba y tambe ta duna “bida nobo” na e asfalt cu no ta mucho deteriora ainda. Cu e producto aki lo kier logra mantene e gastonan di mantencion pa cu asfalt controla y mas abao.

Minister Hooyboer-Winklaar ta subraya cu e parti di mantencion ta esencial, no mester warda pa e infrastructura of parti di dje cay den otro, pero mester manten’e p’e keda bon y asina tambe ta minimalisa e gastonan di mantencion pa haci fondonan liber pa otro areanan di enseñansa cu mester di mas sosten.

 


Info / Contact

Pa mas informacion por busca den e alfabet menu riba homepage:  [F] Faciliteiten  of [O] Onderhoud Scholen.

Scroll To Top
  • © 2011-2023 Department of Education Aruba (DEA)
  • T +297-528-3400
  • F +297-528-3434
  • info@ea.aw

By orbitalnets