Search Facebook Instagram Twitter

Arubahuis a reuni cu Colegio Arubano y Colegio EPI

November 15, 2018

Minister Plenipotenciario Guillfred Besaril durante di su bishita di trabou na Aruba a tene un reunion cu ehecutivonan di tanto Colegio EPI y Colegio Arubano riba preparacion di studiante pa bay Hulanda.


Colegio EPI

Na Colegio EPI minister Besaril, acompaña pa coordinador di enseñansa di Arubahuis James van der Linde, a tene un reunion cu director general di Colegio EPI sr. Ryan Maduro y sra. Irayka Yanez, directora di enseñansa di EPI.

E mandatario a duna un splicacion cu su bishita na Aruba ta pa sigura presencia di Arubahuis na College Fair y pa tene presentacionnan na alumnonan di voorexamenklassen di e tres scolnan secundario mas grandi na Aruba: Colegio San Nicolas, Colegio EPI y Colegio Arubano. Meta di e presentacion ta pa informa e alumnonan riba escogencia pa un estudio y esaki den bista di e mercado laboral di Aruba. Tambe lo duna informacion riba e diferente facetanan di studia na Hulanda, si encaso e alumno mester scoge pa bay studia na Hulanda.

Sr. Ryan Maduro a mustra hopi aprecio pa e plannan di minister Besaril pa bin Aruba pa informa e studiantenan debidamente riba studia na Hulanda. Sr. Maduro tambe a informa e mandatario di e plannan di EPI y e necesidad pa tin partnernan strategico na entro otro Hulanda.

Minister Besaril a indica cu Arubahuis tey pa facilita tur nos instancianan local y pa identifica oportunidadnan di colaboracion y posibel fondondonan disponibel na Europa y specificamente Hulanda cu lo por beneficia nos scolnan na Aruba.


Despues di e reunion sra. Lisa Vrolijk, encarga di HR na Colegio EPI,  a duna minister Besaril un guia riba e compleho di EPI pa mustra e mandatario e diferente facilidad cu EPI ta brinda na su studiantenan.


Colegio Arubano

Na Colegio Arubano minister Besaril a reuni cu rector sra. Michella van Loon, tambe cu sra. Miloushka Boekhoudt-Wernet  y sr. Igmar Davelaar kende ambos ta conrector na Colegio Arubano.

Aki tambe minister Besaril a amplia riba e rason di su bishita na Aruba y e presentacionnan na e diferente scolnan. Minister Besaril a bisa di a mira e nesesidad aki, na momento cu na augustus e aña aki a constata cu un gran parti di e grupo di studiante a yega Hulanda cu un falta grandi di informacion y preparacion. Tambe a constata cu un grupo grandi ta keda scoge e mesun estudionan cu lo por conduci na un saturacion riba e mercado laboral y reduci e chensnan di nos hobennan. Mientras cu Aruba mester di hopi profesionalnan den e sector di salubridad y enseñansa y cu e nocion aki mester crece bou di nos hobennan.

Riba e punto di enseñansa rector Michella van Loon a indica cu Colegio Arubano tin hopi dificultad pa yega na docentenan 1e graad den diferente area, entre otro Wiskunde y Nederlands.

Minister Besaril a bisa sra. Van Loon cu Colegio Arubano por conta cu Arubahuis den duna asistencia unda por pa yuda yena e vacaturanan aki.


E potretnan ta cortesia di Cas di Aruba


Info / Contact

Pa mas informacion por busca [S] Studia na Hulanda den e alfabet menu riba nos homepage of por tuma contacto cu:

Scroll To Top
  • © 2011-2023 Department of Education Aruba (DEA)
  • T +297-528-3400
  • F +297-528-3434
  • info@ea.aw

By orbitalnets