Search Facebook Instagram Twitter

Aruba ta celebra Erasmusdays

October 15, 2019

Departamento di Relacionnan di Reino y Union Europeo den colaboracion cu Departamento di Enseñansa Aruba, ta organisa pa prome biaha #Erasmusdays na Aruba.



Desde aña 2017, bou iniciativa di e agencia nacional di Francia encarga cu desaroyo y ehecucion di e programa di subsidio di Union Europeo Erasmus+, Europa y mundo ta celebra anualmente e logronan di e proyectonan subsidia cu e fondo aki. E aña aki e celebracion di #Erasmusdays ta tuma luga oficialmente dianan 10, 11 y 12 di oktober 2019.

Considerando e exito grandi cu Aruba ta hibando como un Pais-Teritorio (ultramar) di Union Europeo cu e subsidio aki, a dicidi di organisa den cuadro di #Erasmusdays 2019, un evento informativo pa tur cabesante y directiva di scol riba dia 15 di october 2019. Esaki teniendo na cuenta cu e 3 fechanan menciona ta den periodo di vakantie di scol na Aruba.

Riba e dia aki lo tuma luga presentacionnan di e dos departamentonan menciona y tambe di algun di e stakeholdernan principal manera Universidad di Aruba, CEDE Aruba y Colegio EPI. E instancianan aki lo elabora riba nan experiencia, exito y reto nan cu por tin den e desaroyo di un proyecto y e procedura pa e peticion pa subsidio.

E evento lo tuma luga den e auditorium di Colegio EPI cu e meta principal di informa mas hopi di nos scolnan posibel riba e oportunidadnan existente pa entre otro nan instituto, docentenan y alumnonan.

E evento aki a wordo registra oficialmente ariba e pagina web di e celebracion di #Erasmusdays – [erasmusdays.eu] di Comision Europeo y ta spera di por crea visibilidad rond mundo cu esaki compartiendo Aruba su exito.


Erasmus+

Erasmus+ ta e programma di subsidio di Union Europeo disponibel pa entre otro institutonan academico, scolnan, organisacionnan di boluntario, organisacionnan pa hoben y tambe deporte.

Bou capa di un proyecto specifico ta crea mobilidad di individuonan entre e paisnan participante, of por financia desaroyo di cooperacionnan strategico entre e institutonan/ organisacionnan pa por ehempel innovacion y reforma di nan maneho. Tambe tin oportunidad pa subsidio pa e desaroyo di maneho specifico di gobierno den sector laboral pa nos hobennan.

E actual ciclo financiero di Union Europeo 2014-2021 tin mas o menos €14.7 miyon disponibel y esaki lo bay redobla te cu €30 miyon pa e ciclo financiero nobo di 2021-2027.

Ta invita un y tur pa like e paginanan di facebook di Europe House Aruba, Erasmus+ Aruba y tambe di e stakeholders nan menciona pa por sigui e desaroyonan y keda informa tocante e oportunidadnan cu e programa aki ta brinda Aruba.


Info / Contact

Pa mas informacion acudi na facebook pages Europe House Aruba of  Erasmus+ ARUBA of por tuma contacto cu Europe House Aruba

Scroll To Top
  • © 2011-2021 Department of Education Aruba (DEA)
  • T +297-528-3400
  • F +297-528-3434
  • info@ea.aw

By orbitalnets