Search Facebook Instagram Twitter

Aruba a participa na conferencia internacional di Educacion

September 22, 2016

Recientemente Aruba tabata presente entre 7 otro pais y region como co-fundadonan di e Conferencia Internacional di Educacion “Atlantic Rim Collaboratory” cu tabatin como enfoke pa establece mas colaboracion internacional den enseñansa riba e topiconan di accesibilidad, husticia social, oportunidad igual y bienestar general di studiantenan den sistemanan educacional rond di mundo.

Paisnan participante

Minister di Enseñansa Michelle Hooyboer-Winklaar hunto cu un delegacion a representa Aruba na Reykjavik, Iceland. E paisnan y regionnan representando nan sistema educacional ademas di Aruba cu a bin hunto pa e conferencia aki ta entre otro IcelandFinlandScotlandIrelandCanada y Merca.

Ademas di e delegacionnan di e paisnan participante tabatin varios profesional y experto presente di entre otro SingaporeFinlandMercaAustraliaNoruega y Colombia cu a comparti nan conocemento y perspectiva riba e topiconan riba cual a concentra.

Sistema educacional

Un di e expertonan mundialmente famoso cu a participa na e conferencia ta Sir Ken Robinson, conoci pa su investigacionnan y tur su charlanan critico riba sistemanan educacional tradicional. El a menciona den su charla cu muchanan ta gusta siña y cu nan tin un curiosidad natural, pero cu muchanan no tur biaha ta gusta wordo educa den settingnan formal.

Sir Ken Robinson ta indica cu e sistema tradicional di educacion ta kita apetit di e muchanan pa siñamento y ta resulta den menos curiosidad, menos envolvimento cu nan mesun proceso di siñamento y tambe den menos pregunta of remarca durante les for di e alumno.

Robinson ta boga den su charla pa un sistema educacional cu ta enfoca riba “deeper learning” y no solamente riba resultado.

Dr. Pak Tee Ng di e National Education Institute di Singapore a sigui riba e mesun liña cu Sir Ken Robinson y a splica di e vision y maneho nacional nobo di Singapore cu ta hiba e lema “Teach less, learn more”. Dr. Ng ta accentua cu pa Singapore maestronan ta “nation builders” y cu nan ta considera maestronan sumamente importante pa e desaroyo di tur area di nan pais.

Dr. Ng ta splica cu aunke Singapore su sistema educacional y nan alumnonan ta score hopi bon riba tur e rankings internacional pa loke ta nivel academico nan ta constata cu ainda nan sistema ta hopi tradicional y cu esaki no lo ta sostenibel pa e futuro generacionnan. Singapore ta haciendo un cambio grandi pa loke ta nan vision pedagogico didactico moviendo di un sistema cu ta hopi dirigi riba ofrece contenido na un sistema mas dirigi riba e alumno. Asina Singapore ta spera di logra envolvi studiantenan hopi mas den e proceso di siñamento.

Vicky Colbert, fundado di e NGO Escuela Nueva di Colombia ta un di e otro expertonan cu a comparti su conocemento riba e area di husticia social, accesibilidad y oportunidad igual den enseñansa. El a concentra riba e aspectonan di sostenibilidad ora ta trata cambio den sistemanan educacional den un contexto vulnerabel. Esaki sea pa motibonan financiero of stabilidad politico.

E experto di Colombia ta accentua cu e reto no ta pa introduci cambio den e sistema educacional, pero mas bien con pa sostene e cambio. Den caso particular di Colombia, Colbert a menciona cu tur cambio mester ta “feasable”, “cost effective”, “scalable”, “replicable” specialmente ora bo fondonan financiero no ta infinito. Segun Vicky Colbert ora no tin placa pa educacion bo ta wordo forsa pa ta creativo y pa bay bek na e “core”, e esencia di educacion.

Un ehempel concreto di Colombia e ta menciona cu tur metodo y buki mester ta “hybrid”, cu “open ends”, mirando cu no tin placa pa buki nobo cada pasa algun aña. Esaki a obliga educadornan riba tur nivel pa “rethink” e proceso di diseño di material pa scol. Algo cu ta dunando su frutonan grandemente na Colombia.

Accesibilidad na sistemanan educacional

Un di e expertonan cu sigur a capta atencion cu su charlanan y perspectiva riba sistemanan educacional rond mundo tabata Dr. Jeannie Oakes, kende ta sociologo specialisa den e area di educacion y Presidente di American Educational Research Association (AERA).

Dr. Oakes tin mas cu 25 aña di experencia haciendo investigacion riba con accesibel sistemanan educacional ta pa tur grupo den sociedad y con ta aplica e normanan di husticia social den educacion. Dr. Oakes ta concentra hopi riba e aspectonan di rasa, gender, status social economico y idioma. Un di e conclusionnan mas fuerte cu Dr. Oakes a trece dilanti ta cu “research follows values”, esta investigacion den enseñansa y e resultadonan di esaki ta un refleho di e norma y balornan cu ta persistente den un sistema educacional of den un pais.

Un ehempel indiscutibel di esaki ta investigacionnan di 100, 50 of hasta 20 aña pasa cu ta conclui cu alumnonan femenino of alumnonan di e rasa afro Americano tin menos capacidad y esey ta e motibo pakico nan no ta representa den enseñansa, specialmente den e nivelnan mas halto di enseñansa, incluso enseñansa superior. Esaki tabata wordo uza pa hustifica exclusion di cierto gruponan for di enseñansa.

Awendia tur e investigacionnan aki a wordo bari for di mesa. Es mas, e populacion mas grandi awendia den enseñansa superior ta hende muhe. Mester constata si cu ainda exclusion ta tuma luga na gran escala y kier purba hustifica esaki door di un percepcion di capacidad di cierto gruponan.

Un di conclusionnan mas importante di e conferencia ta cu no por existi asina yama “dead-ends” den un sistema educacional. Mester crea opcion unda cu no tin alternativa y mester elimina cualkier obstaculo pa alumnonan por sigui studia.

Minister Hooyboer-Winklaar  ta comparti e pensamento aki completamente y ta indica cu esaki ta un di e prioridadnan mas halto den e maneho di enseñansa cu Aruba ta bin ta hibando pa e ultimo añanan.

E experto dr. Pasi Sahlberg di Finland, cual pais ta conoci internacionalmente pa un di e sistemanan educacional mas miho na mundo, ta accentua cu excelencia y calidad den bo sistema educacional ta bay man den man cu e aspectonan di accesibilidad y oportunidad igual. No por perde inclusion y accesibilidad for di bista ora cu ta traha riba calidad segun dr. Sahlberg.

Minister Hooyboer-Winklaar ta menciona di ta hopi contento y satisfecho cu e participacion di Aruba. Nos pais, aunke chikito, tabatin un contribucion hopi grandi na e conferencia aki y e tabata hopi bon pa mira cu nos ta moviendo den e bon direccion hunto cu e resto di mundo. Tur e charlanan di e expertonan durante e conferencia na Iceland y tambe informacion adicional di e conferencia ta obtenibel riba e website www.atrico.org.


Info / Contact

Pa mas informacion por busca den e alfabet menu riba homepage: [M] Ministerio di Enseñansa

Scroll To Top
  • © 2011-2023 Department of Education Aruba (DEA)
  • T +297-528-3400
  • F +297-528-3434
  • info@ea.aw

By orbitalnets