Search Facebook Instagram Twitter

Animacion digital pa mucha na Papiamento

May 27, 2020

Playhouse Entertainment ta crea animacionnan digital y material educativo y dibertido na Papiamento pa mucha (0-6 aña) pa yuda enrikece nos cultura y idioma, como curasha momentonan dibertido y sano pa henter famia.

Awendia nos muchanan ta wordo confronta constantemente cu medianan digital di entretenimento online manera “Youtube” of “Netflix” na unda tur e programanan ta generalmente na e idioma ingles. Manera tambe por ripara, ingles a bira e idioma di comunicacion popular entre e muchanan.

Tambe door di tur e media nobo nan aki, muchanan ta lesando cada biaha menos y si e muchanan of mayornan kier scoge pa stimula e lesamento mes, e material na nos mesun idioma ta scars. Specialmente pa mucha chikito bou di 5 aña.

Cu ayudo di Unoca y Fundacion Lanta Papiamento, sra. Jessica van Montfoort-Posner y su casa Marald van Montfoort a bin cu un concepto nobo na unda nan a traha un buki duru di carton na Papiamento pa mucha chikito entre 0-5 aña cu ta protagonisa un haraña biña cu yama “Nini”. Tambe nan a traha animacionnan digital na Papiamento riba “youtube” cual ta siña e muchanan conta, colornan, bestianan, nos canticanan pa mucha y hopi mas na nos idioma Papiamento den un manera innovativo y dibertido.



“Como mayor di dos yiu di edad di 2 y 4 aña semper nos tabata asombra di con nan a siña forma, color, conta etcetera na ingles door di programanan riba Youtube y nos a pensa, esaki ta algo cu nos mester tin na Papiamento tambe!” Asina sra. Jessica ta commenta.

“Di nos mesun experiencia como mayor, nos a siña cu tin dos manera esencial pa mucha por siña un idioma na un manera dibertido. Bo tin e manera “offline”, cual ta cu buki y ilustracionnan y bo tin e manera “online” interactivo cu awendia ta cambiando e mundo di entretenemento y educacion. Asina mes nos a ripara cu ta hopi importante pa ofrece esakinan na e muchanan den un balans sano.” Jessica ta continua.

Jessica ta splica cu di eynan nan iniciativa a bin pa trece un buki (bukinan) y metodonan audiovisual riba mercado pa enrikece e Papiamento di nos muchanan.

“Door di siña conoce e caricaturanan digital e muchanan ta reacciona den un manera hopi positivo riba e buki tambe. Pa nan e ta haña bida y asina tambe ta pushanan pa nan kier sa mas di e caricaturanan cu nan ta wak riba Youtube y ta curasha nan gusta e buki mas” Jessica ta splica.

Jessica tambe ta enfatisa riba e hecho cu e lesamento cu e muchanan ta crea un momento special cu mayornan por comparti cu nan yiunan y asina engrandece e relacion como famia.

Pa esunan cu ta interesa nan por bishita e canal di youtube via bit.ly/funwithnini of busca funwithnini den den youtube:



E buki mes “Nini ta sali keiro”, cual ta conta e storia di Nini e haraña su aventura na Philip’s Animal Garden ta obtenibel na Plaza bookshop, Dewit & Vandorp, Giselle department store y Casa na Superfood.


Info / Contact

Fun with Nini (facebook page)

Scroll To Top
  • © 2011-2021 Department of Education Aruba (DEA)
  • T +297-528-3400
  • F +297-528-3434
  • info@ea.aw

By orbitalnets