Aña escolar 2023-2024
En conexion cu comienso di aña escolar 2023-2024, Prome Minister (Evelyn Wever-Croes) y Minister di Enseñansa (Endy Croes) ta desea cada alumno, mayor y maestro hopi exito pa cu e aña escolar nobo.
Mensahe di Prome Minister Evelyn Wever-Croes
Manera ta conoci, nos ta den e ultimo dianan di vakantie di scol, y hopi ta e muchanan cu ta preparando pa cuminsa un aña escolar nobo, yena di energia y enthusiasmo. E mayornan tambe yena di emocion, ta cumprando tur material necesario y preparando tur cos na cas, pa asina nan yiu ta bon prepara pa cuminsa un aña mas di estudio.
E maestronan di nan banda a drecha e klasnan pa asina duna un bon bini na tur e muchanan, cu ansiosamente ta warda pa sera conoci cu nan maestro nobo y compañeronan di klas.
Prome Minister Evelyn Wever-Croes ta desea tur alumno hopi exito pa cu e aña escolar nobo. Tambe, e ta pidi tur e muchanan pa haci nan best, y duna tur di nan banda pa logra resultadonan positivo. E ta tuma hopi esfuerso y perseverancia pa logra yega na metanan profesional, pero unabes cada alumno duna nan parti, pa ta e miho version di nan mes, nan lo logra cosnan grandi, haciendo nan mes, nan mayornan y nan maestro sumamente orguyoso di nan.
“Un danki tambe na tur maestro pa e amor cu nan ta eherce den nan trabou, yudando asina e mayornan educa nan yiunan di e miho forma. Ta danki na boso esfuerso, Aruba por conta cu profesionalnan grandi den futuro, cu por carga y hiba e pais aki den e mihor direccion. Mi ta desea tur clase di exito na tur alumno, mayor, y maestro pa cu e aña escolar 2023-2024” Prome Minister a expresa.
Mensahe di Minister di Enseñansa Endy Croes
Minister di Enseñansa Endy Croes ta desea tur alumno, pero tambe tur maestro un aña escolar exitoso. Minister Croes ta sigui bisa cu enseñansa ta e fundeshi di un pais. Enseñansa ta e motor di un pais y ta hopi importante pa e desaroyo profesional y personal di nos hobennan y di cada conciudadano. Enseñansa ta e yabi pa forma un comunidad competente y asina hunto crea un miho sociedad.
Minister Croes ta encurasha tur mayor pa sigui guia, motiva y inspira boso yuinan pa haci nan maximo esfuerso na scol. Splica nan tur dia continuamente e importancia di enseñansa. Alabes, ta termina deseando nos maestronan y tur esnan den e campo di enseñansa hopi pasenshi, amor y sabiduria pa e aña escolar nobo. Nos ta orguyoso di bosonan y masha danki pa contribui den e desaroyo di Pais Aruba. Boso trabou ta altamente aprecia.
