Acuerdo cu Centennial College

November 14, 2016

Na november 2016 Gobierno di Aruba a firma un acuerdo (Memorandum of Understanding – MoU) cu Centennial College of Canada. E MoU ta ofrece varios beneficio na e studiante di Aruba cu ta desea di sigui un di e programanan di dos, tres y cuater aña y/of post graduado.

For di luna di Mei 2016 Minister di Enseñansa Michelle Hooyboer-Winklaar tabata den dialogo cu Centennial College despues di su bishita na nan campus principal na Toronto, Canada.

Durante di e bishita na Centennial, Minister di Enseñansa, Michelle Hooyboer-Winklaar, a reuni cu varios ehecutivo di e scol incluyendo e Presidente Sra. Ann Butler. A cuminsa papia riba posibel Memorandum of Understanding (MoU) entre Aruba y e scol.

“Mi ta sumamente contento cu despues di apenas 6 luna nos por ta na e momento di firmamento di un acuerdo cu lo duna nos studiantenan mas oportunidad na un Institucion di Enseñansa superior di halto calidad.” E mandatario a splica despues di e firmamento.

E MoU ta duna e studiante Arubano cu ta desea di sigui cualkier di e programanan di dos, tres y cuater aña y/of post graduado cu nan ta ofrece varios beneficio.

Regional Manager International Business Development di Centennial College, esta Marina Laurence tabata na Aruba pa e “College Fair” y e firmamento di e MoU. Loke mas a capta su atencion tabata cu e comunidad di Aruba ta mesun multicultural cu e comunidad di Toronto. Tabata su prome bishita na Aruba, y el a combersa cu masha hopi hoben.

E MoU, segun Laurence ta splica, ta encera un yudansa extra pa hobennan di Aruba cu ta desea di studia na Centennial College. Cada studiante, segun e acuerdo cu Gobierno, ta provee un ‘scholarship’ di 2000 Dollar Canades pa cada studiante pa aña.

Marina Laurence tabata hopi entusiasma cu e oportunidad di tin contacto cu studiantenan di Aruba y ofrece nan e beneficio aki, pa e 160 programanan cu e scol ta ofrece. Centennial College tin 25 mil studiante, di cual 6000 ta studiantenan internacional, procedente di mas di 100 diferente pais.

Centennial College, segun Laurence ta splica, ta kere firmemente cu “pathways” ta marca e caminda pa exito. Esaki kiermen cu e studiante no mester studia te dia cu e tin 30 aña pa logra su carera academico completo di biaha. Centennial College ta kere den e oportunidad pa e studiante logra un diploma di dos aña, despues di cual e por scoge pa bay traha y bolbe bek algun aña despues pa sigui cu su estudio. E flexibilidad aki ta ofrece e studiante yega su metanan den diferente fase y ta exitoso, logrando tur loke e kier na final.

E MoU ta drenta na vigor inmediatamente y lo ta aplicabel pa tur studiante cu wordo acepta na Centennial College.

[Mas informacion di e acuerdo cu Centennial College]