Por wak e conferencia di prensa di diaranson 5 di januari 2022 aki:
9 di januari 2022
Uzo di tapaboca pa mucha bou di 12 aña ta keda un recomendacion y no obligacion
Dialuna dia 10 di januari 2022 scol ta cuminsa atrobe. Apesar cu Aruba ta enfrentando un aumento den casonan di COVID-19 segun datos muchanan bou di 12 aña no ta e grupo na risico pa cual motibo Crisisteam no ta mira e nesesidad pa wanta scol sera mas dia y perhudica educacion di nos muchanan.
Apesar cu nos muchanan bou 12 aña no ta e grupo na risico, Crisisteam ta sinti e preocupacion bou di algun mayor pa cual motibo ta laga e uzo di tapaboca na scol pa mucha bou di 12 aña un decision di cada mayor of voogd. Mirando cu den mayoria caso positivo muchanan bou 12 aña ta desaroya sintomanan leve, Crisisteam ta haci e apelacion na mayornan pa no manda ningun mucha scol ora cu nan tin sintoma parecido na griep, pa leve cu esakinan por ta, pero tuma e miho decision y laga test e mucha pa di e forma aki proteha otro muchanan y tambe yuda mantene e cantidad di contagio bou di nos muchanan.
5 di Januari 2022
Pa bienestar y siguridad di alumno y maestro ta pospone fecha cu scol ta habri
E siman aki Gobierno di Aruba a tuma e decision cu scolnan lo no habri 6 di januari, pero lo habri dialuna 10 di januari. A tuma e decision aki basa riba e cantidad di casonan pero tambe door di informacion ricibi di directivanan di scol cu ta indica cu varios docente y alumno ta den isolacion y cuarentena. Pues si cuminsa scol dia 6 di januari lo tin falta di docente cual ta crea otro reto tambe. Mester tene cuenta cu e dianan extra cu scol ta keda cera, no ta dia extra di vakantie, pues docentenan mester tuma contacti cu directiva di nan scol pa e maneho cu nan ta aplica. Banda di esaki, durante di e dos dianan aki mester percura pa protocolnan ta ‘in place’. Segun proyeccion, mayoria di esnan den cuarentena/isolacion lo a sali, pero ta pidi pa scolnan informa Crisis Team diabierna di e situacion. Pa eorey por evalua un bes mas a base di datonan, si e situacion a mehora of empeora.
Algun excepcion
Tin algun scol cu a pidi pa cuminsa dia 6 di januari, ta trata di scolnan chikito cu tin nan proceduranan in place. A haya informacion cu docentenen y alumnonan tey, pues nan a haya aprobacion pa cuminsa. Pa loke ta crechenan, tin cu ta habri y tin otronan cu por habri caba den caso cu nan tin nan proceduranan na luga. Premier Evelyn Wever – Croes, den nomber di Gobierno di Aruba ta expresa palabra di reconocemento y aprecio grandi pa tur cu ta traha den e sector di enseñansa, cu den tempo dificil a haya nan ta bira hopi creativo, a demostra nan dedicacion y esfuerso pa sigui brinda enseñansa den e tempo dificil aki.
Fuente: Isla Online, diaranson 5 di Januari 2022
6 di Januari 2022
Minister di Enseñansa ta gradici veld di enseñansa y ta desea nan exito den aña 2022
Minister di Enseñansa (Croes) a comenta riba e ultimo desaroyo di Covid-19 y e variante Omicron cual ta di cinco ola cu Aruba y mundo ta confrontando. Na Aruba nos a surpasa 3000 caso positivo cual ta e number di mas halto te cu awor. No obstante e compas y maneho di Gobierno cu ta keda e balansa entre salud di nos ciudadanonan y economia, nos por a tuma nota e preocupacion grandi si scol ta inicia dia 6 di januari of no. E mandatario a sigui bisa; nos no por laga afo cu capacidad di Hospital ta keda e monitor principal. Mester agrega y splica cu e ekipo encarga cu entre otro ‘kluster’ 4 bou di cual Enseñansa ta resorta, a reuni diamars ultimo te den oranan laat di anochi considerando tur aspecto importante den laso estrecho cu ‘schoolbesturen’ pa por a tuma e siguiente decision. Scol lo habri pa alumnonan dialuna dia 10 di januari mientras staf y docentenan lo prepara y reforsa tur protocolnan vigente y ‘schoolbesturen’ lo inventarisa pa diabierna mas tarda cuanto maestronan, alumnonan y mayornan ta den cuarentena y of tin Covid-19. Tur cos ta indica cu dialuna scol por cuminsa normal.
E Minister di Enseñansa a expresa di ta contento cu e decision y ta enfatisa cu siguridad y bienestar di docente y alumnonan ta hopi importante pa Gobierno di Aruba. Alabes Minister Croes ta gradici e docentenan pa nan dedicacion y esfuerso den temponan dificil keda educa nos hobennan y ta aprecia esaki masha hopi. Minister Croes den nomber di Gabinete Wever-Croes 2 ta desea tur den e veld di enseñansa hopi exito, forsa y sabiduria den aña 2022. Union ta haci nos fuerte y hunto nos lo surpasa tur barera. Danki y Exito!
Fuente: Isla Online, diahuebs 6 di Januari 2022
Pa mas informacion di e decisionnan di Gobierno di Aruba:
