World Teachers’ Day 2016

October 10, 2016

Desde aña 1994 ta celebra World Teachers’ Day riba dia 5 di october. Un fecha asigna pa promove e profesion Maestro di Scol y pone atencion na su rol esencial pa provee enseñansa di calidad riba tur nivel, segun UNESCO y Education International.

E aña aki tambe ta conmemora e di 50 aniversario di e firmamento di e “UNESCO/ILO Recommendation Concerning the Status of Teachers” (5 di october 1966) y e prome aña di e “Global Education 2030 Agenda”(2015).

E tema pa World Teachers’ Day di e aña aki, Valuing Teachers, Improving their Status, ta incorpora e principionan fundamental di e “UNESCO/ILO Recommendation” y e necesidad y importancia pa sostene e Maestro di Scol manera refleha den e “Sustainable Development Goals”.

Un di e metanan (SDG 4 Education 2030) ta specificamente un compromiso pa sigura educacion di calidad, inclusivo y husto y pa promove e oportunidad pa siña pa bida largo pa un y tur (lifelong learning).

 

Pa logra e metanan aki ta considera e rol di e Maestro di Scol como uno cardinal, y pa e motibo mester balora, motiva y sostene e Maestro di Scol.

UNESCOILOUNICEF y otro organisacionnan cu ta sostene World Teachers’ Day, ta dedica e dia aki na celebracion y reafirmacion di un compromiso pa duna balor na e profesion di e Maestro di Scol.

Aruba

Na Aruba, al rededor di 1400 Maestro y Docente ta dedica nan mes na enseñansa y educacion di nos yiunan. Un trabou importante y bunita, pero tambe di hopi responsabilidad y cu hopi reto. E Maestro di Scol awendia tin un rol hopi mas amplio cu solamente para dilanti klas y traspasa conocemento. E mester duna guia, ta un bon ehempel, motiva y inspira e alumno mientras cu e sa traha cu recurso minimo y mester competi cu tecnologia moderno.

Awe, na ocasion di World Teachers’ DayDepartamento di Enseñansa Aruba (DEA) ta uni su mes na organisacionnan rond mundo cu ta celebra, felicita y gradici e Maestronan di Scol pa nan valioso trabou.

Mensahe di Minister di Enseñansa

Awe, 5 di october, mi a kier a tuma e tempo pa felicita cada un maestro, docente y actor di sosten cu ta traha den Enseñansa. Banda di felicitanan mi kier gradici nan pa nan contribucion, dedicacion y esfuerso diario pa duna e mihor enseñansa pa nos studiantenan. E no ta e trabou di mas facil y tampoco kizas semper ta scucha “danki”, pero awe rond mundo, e trabou di e maestro ta wordo reconoci y elogia.

E trabou di maestro realmente ta un “yamada” y un bon maestro no solamente ta yuda studiante siña, pero ta inspira, ta yuda descubri tesoro personal, y ta saca lo maximo di cada un di su studiantenan.

Pabien na un y tur, y danki pa a scohe e profesion di educador!

Minister Michelle Hooyboer-Winklaar

 


Info | Contact

Pa mas informacion por busca den e alfabet menu riba homepage: [L] Luna di Enseñansa of por tuma contacto cu: Departamento di Enseñansa Aruba | Ministerio di Enseñansa

Scroll To Top
  • © 2011-2019 Department of Education Aruba (DEA)
  • T +297-528-3400
  • F +297-528-3434
  • info@ea.aw