“World Class Scholar”

October 10, 2016

Ministerio di Enseñansa ta organisa un “kick-off event” pa lansa e proyecto di intercambio internacional World Class Scholar, un proyecto di intercambio entre docentenan y scolnan di e estado South Carolina na Merca cu docentenan y scolnan rond mundo.

World Class Scholar ta un iniciativa di e organisacion Envision South Carolina den colaboracion cu South Carolina State Department of Education College of Charleston. Como cu Aruba tin un laso estrecho cu e estado di South Carolina na Merca riba e tereno di educacion, nos isla a wordo acerca pa participa na e proyecto aki cu ta completamente gratis y ta wordo facilita na tur e docentenan y scolnan interesa den nos sistema local.

Docentenan por participa individual of como grupo na e proyecto aki. Durante di e “kick off event” nos lo tene un skype session cu e organisadonan di e proyecto aki y posiblemente tambe cu un scol di South Carolina pa asina duna mas informacion y tambe intercambia di experencia cu tur e interesadonan di nos scolnan di Aruba. Tambe lo tin oportunidad pa tur esunnan presente haci pregunta.

E “kick-off event” pa e proyecto di World Class Scholar ta tuma luga diahuebs 20 di october di 2or di merdia pa 4or di atardi den e presentatiezaal di Cocolishi na Bestuurskantoor na Oranjestad.

Mas informacion: [World Class Scholar information flyer]

Registra

Participacion na e proyecto y na e “kick-off event” ta completamente gratis.

Mirando cu nos tin un capacidad limita pa e evento nos ta pidi tur docentecabesante director of directiva di scol cu ta interesa den e proyecto aki pa registra via Ministerio di Enseñansa door di manda un email cu specificacion di nomber y school na: [j.vanderlinde@arubagovernment.aw].

Ultimo dia pa registra ta dialuna 17 di october.

Ministerio di Enseñansa ta enfatisa e importancia di iniciativanan pa stimula mas intercambio internacional y cultural den enseñansa y ta sumamente entusiasma cu e oportunidadnan cu e proyecto aki ta brinda nos docentenan y nos studiantenan di Aruba. Nos ta spera di por conta cu un interes grandi for di maestronan pa e proyecto unico aki.

 


Info / Contact

Pa mas informacion por busca den e alfabet menu riba homepage: [M] Ministerio di Enseñansa

Scroll To Top
  • © 2011-2019 Department of Education Aruba (DEA)
  • T +297-528-3400
  • F +297-528-3434
  • info@ea.aw