Vierlandenoverleg Onderwijs 2016

December 1, 2016

Recientemente Aruba tabata anfitrion di e reunion anual di Ministerionan di Enseñansa di Reino Hulandes, e asina yama Vierlanden Overleg, un plataforma cu ta beneficia tur partner.


Durante e Vierlandenoverleg Onderwijs tur partner ta haya e oportunidad pa discuti topiconan actual y di gran importancia pa tur pais y ta cambia y agrega topiconan segun e necesidadnan y interes comun.

Pa e encuentro di e aña aki (2016) a discuti y intercambia riba diferente topico den e areanan di enseñansa secundarioenseñansa vocacional (Beroepsonderwijs) y enseñansa superior.

Programmamanager pa Ministerio di Enseñansa, Cultura y Ciencia di Hulanda, esta sr. Aldrik in ‘t Hout a remarca cu durante e encuentro aki a discuti entre otro e relacion di trabou y a tene reunionnan di Inspectie van het Onderwijs. Esakinan ta topiconan di interes general y por nota cu asuntonan relaciona na enseñansa na cada pais ta diferente, pero nan ta comparabel. Un cos sigur cu ta mira den tur parti di Reino ta e ambicion cu mayornan tin, e deseo, pa mira nan yiunan cu un bon enseñansa y cu cada mucha por demostra su capacidad y talentonan cu loke ta wordo provee na nan pa nan por asina contribui na e economia di nan pais, in ‘t Hout a laga sa.



Di parti di Ministerio di Enseñansa, Hubentud, Cultura y Deporte di Sint Maarten, a participa Secretario General sra. Jorien Wuite. El a observa cu e reunionnan ta bay bon y den bon ambiente. Sint Maarten ta haya e colaboracion importante y a mira esaki tambe den e rapport cu ta indica un balor añadi di e reunionnan entre e inspectornan di enseñansa. Wuite a bisa cu e ta haya cu e contenido di e discusionnan ta bon y a mira por ehempel den e presentacion amplio di Aruba encuanto e desaroyonan den enseñansa vocacional algun elemento cu por wordo aplica na Sint Maarten.

E reunionnan ta importante pa e cuater paisnan como oportunidad pa intercambia di idea y mantene otro informa di loke ta tumando luga den cada pais, segun Maritsa Silberie, colaborado di maneho pa Gobierno di islanan BES. Enseñansa riba e islanan BES ta pasando den cambionan hopi grandi y por saca  beneficio di e informacion tocante di e miho practicanan cu ta wordo comparti na e reunionnan, mescos cu e otro islanan por saca beneficio di e informacion cu BES ta ofrece. Silberie a añadi cu tambe nan lo por siña di problemanan cu actualmente e otro islanan ta pasando aden, y nan por den futuro haya nan mes confronta cune.



E encuentronan tambe a conta cu participacion di Irelnety Viscaino-Copra di Ministerio di Enseñansa, Ciencia, Cultura y Deporte di Corsou. El a remarca cu e reunion ta un plataforma unda cu ta haya oportunidad pa e islanan y Hulanda papia tocante di topiconan actual. El a splica cu na 2015 a atende puntonan riba cual a haci un “follow up” e biaha aki, como cu sigur ta importante pa evalua unda ta para, kico e resultadonan ta, y con cada pais a atende cu e punto di discusion of preocupacion y agrega topiconan actual. Un di e topiconan actual ta e “aansluiting” di enseñansa vocacional (beroepsonderwijs) riba e mercado laboral.

A discuti tambe e topico di studia den regionaccesibilidad di enseñansa superior na Hulanda pa studiantenan di e islanan di reino como tambe e aspectonan di conexion y rendimento. Naturalmente e topico di calidad di enseñansa semper ta keda un topico importante, y relaciona na esaki e parti di cuido cual ta un condicion importante.

Na final e paisnan a haci diferente palabracion concreto pa loke ta intercambio di data y informacion como tambe colaboracion bilateral of conhunto pa loke ta proyectonan y iniciativanan cu por beneficia e educacion di e paisnan den reino.

E siguiente Vierlandenoverleg Onderwijs lo tuma lugar otro aña na Corsou.


Info / Contact

Pa mas informacion por busca [V] Vierlanden Protocollen den e alfabet menu riba homepage of por tuma contacto cu Ministerio di Enseñansa

Scroll To Top
  • © 2011-2019 Department of Education Aruba (DEA)
  • T +297-528-3400
  • F +297-528-3434
  • info@ea.aw