Utimo dia pa inscribi pa PDG y 21+ Toets na IPA
Instituto Pedagogico Arubano (IPA) ta informa cu e utimo dia pa inscribi pa PDG y 21+ Toets na IPA ta diabierna dia 1 di februari 2019.
PDG
E curso di Certificacion Pedagogico Didactico (PDG) ta un curso parcial pa e profesionalnan cu kier ta competente den e profesion di docente of educador. Pa medio di e curso di PDG e profesionalnan por desaroya competencia pedagogico y didactico. E graduado di PDG por duna un materia na enseñansa profesional y scol secundario.
E curso tin un duracion di 2 aña y cada aña ta consisti di 4 blok. E cursista lo haya les dos biaha pa siman na IPA. Banda di esaki lo tin tarea pa haci na cas, na scol, online y tarea practico. E curso di PDG lo cuminsa fin di augustus 2019.
Tin dos grupo di participante cu por haci e curso di PDG:
1. maestro cu ta trahando ‘onbevoegd’ den enseñansa secundario e.o. EPI y MAVO.
2. profesionalnan den e.o. empresa, instancia cu tin interes y motivacion pa sa mas di enseñansa y kier traha riba nan conocemento y habilidad pedagogico didactico.
Pa e grupo di profesionalnan den veld PDG ta un rekisito pa drenta sector di enseñansa.
 |
Inscripcion PDG
Tur persona cu ta interesa pa haci e curso di PDG por pasa na Studenten Services di IPA entre 8 or di mainta cu 12 or di merdia y entre 1or cu 3.30 di atardi pa inscribi.
Pa por inscribi pa e curso di PDG mester tin diploma minimo di HBO. Bo formacion preparatorio (vooropleiding) mester tin un conexion cla cu un materia na MAVO, HAVO, VWO, EPI y EPB.
Mester trece e papel di registro civil (papel di AWG 5,-), copia di diploma minimo HBO y copia di bo lista di cifra. Tambe mester entrega personalmente e documento di informacion personal, cu por download for di website di IPA.
21+ Toets
Bo kier haci e estudio pa Maestro di Enseñansa Primario of Bachelor Hulandes y no tin diploma sea di HAVO, VWO of MBO nivel 4 pero bo tin minimo 21 aña? Ata bo chens!
 |
Inscripcion 21+ Toets
Tur persona cu tin desde 1 di september 2019 minimo 21 aña y cu kier haci un estudio na IPA pero no tin e diploma cu IPA ta exigi, ta bin na remarke pa haci e asina yama 21+ Toets. E 21+ Toets ta midi si un persona tin e nivel di HAVO y ta conta solamente pa estudionan inicial cu IPA ta ofrece durante aña academico 2019-2020, esta e estudio pa Maestro di Enseñansa Primario y Bachelor Hulandes.
E 21+ Toets lo tuma luga diasabra dia 9 di februari 2019. Si bo pasa e test aki cu exito, bo ta bin na remarca pa participa na un trayecto di preparacion pa e test di admision. Esaki lo tuma luga entre maart y mei 2019. E test di admision pa estudio di Maestro di Enseñansa Primario lo tuma luga fin di mei/ comienso di juni 2019. Esun pa Bachelor Hulandes lo tuma luga na mei 2019.
Tur persona cu ta interesa pa haci e 21+ Toets por pasa na Studenten Services di IPA entre 8or di mainta cu 12or di merdia y entre 1or cu 3.30 di atardi pa inscribi. Pa por haci esaki mester trece e papel di registro civil (papel di AWG 5,-) y AWG 75,- p’asina cumpli cu e gastonan di inscripcion. E ultimo fecha pa inscribi pa e 21+Toets ta 1 di februari 2019. Despues di e fecha aki no por inscribi mas pa aña academico 2019-2020.
E ultimo fecha pa inscribi pa PDG y pa 21+ Toets ta dia 1 di februari , despues di e fecha aki no por inscribi. Pa mas informacion por tuma contacto cu Studenten Services na 5243100 of por bishita nos pagina di facebook ‘Instituto Pedagogico Arubano’ of nos website ipaaruba.com.
Info / Contact
Pa mas informacion por busca [I] Instituto Pedagogico Arubano (IPA) den e alfabet menu riba homepage of por tuma contacto cu IPA
Scroll To Top
