Un comienso nobo pa Enseñansa Secundario Special na Aruba

February 11, 2015

E Scol Practico pa Ofishi (SPO) a keda oficialisa door di Gobernador di Aruba y Minister di Enseñansa pa medio di un landsbesluit. Asina e unico school secundario special di Aruba ta keda oficialmente funda y independisa di Stichting Educacion Profesional Basico (SEPB).  Esaki ta significa un comienso nobo pa Enseñansa Secundario Special na Aruba.



Enseñansa Secundario Special tabata resorta pa hopi aña bou di e maneho di SEPB y tabata carga e nomber di Aspirantopleiding. Bou di SEPB tabata tin dos diferente locaties di e Aspirantopleiding, un locatie na Santa Cruz y un locatie na EPB San Nicolas.

Den pasado a dicidi pa inclui e parti aki bou di e capa di EPB saliendo for di e vision di inclusion di tur alumno den enseñansa secundario y unda cu ta comparti e facilidadnan pa formacion profesional basico.

Den transcurso di añanan a mira cu e concepto aki no a resulta positivo den practica door di diferente factor. Na aña 2013 gobierno a tuma e decision pa tuma e maneho di Aspirantopleiding for di EPB y traspas’e pa Dienst Publieke Scholen (DPS). Un di e prome retonan cu Minister Hooyboer-Winklaar a enfrenta cu ne na comienso di su periodo como Minister tabata e situacion di Aspirantopleiding cu tabata pendiente.

Minister Hooyboer-Winklaar a sinta na mesa cu SEPB na varios ocasion pa delibera y pa sondea e diferente opcionnan pa drecha e situacion di Aspirantopleiding bou di maneho di SEPBSEPB na e momento ey no tabata comparti e mesun vision cu Minister Hooyboer-Winklaar y aki ta caminda cu despues di varios luna na mesa Minister a tuma e decision na juni 2014 pa independisa e Aspirantopleiding.  Hunto cu SEPB a yega na e acuerdo cu e maneho di Aspirantopleiding lo cay desde 1 di augustus 2014 bou di Dienst Publieke Scholen, lo instala un stuurgroep pa guia e proceso di independisacion y cu lo tene un periodo di transicion di un aña caminda cu tur e aspectonan di finansas, personal y facilidadnan lo keda regla.


Stuurgroep

Na comienso di juli 2014 un stuurgroep a keda oficialmente instala pa cuminsa traha riba e transicion di maneho di e Aspirantopleiding. E stuurgroep ta consisti di representantenan di DPSSEPB y Ministerio di Enseñansa. E prome lunanan tabata sumamente intensivo pa e stuurgroep mirando cu mester a realisa varios trabou pa asina ambos localidad por a start bou di un maneho nobo pa aña escolar 2014-2015. A tene varios encuentro cu e docentenan y mayornan pa informanan di e cambionan.

Tambe mester a muda e Aspirantopleiding di EPB San Nicolas completamente pa un localidad temporal na Savaneta. Entre juli y augustus mester a haci reparticion di inboedel, bestel meubilario y materialnan nobo, renoba e localidad temporal y mester a haci overdracht oficial di tur documentacion y informacion administrativo y financiero. E stuurgroep ta trahando ainda riba tur e puntonan cu tin pendiente pa asina por completa e fase di transicion y atende cu tur e retonan cu e schoolnan ta encontra durante e periodo aki. Tur esaki ta posibel door di e trabou y sosten di tur e partnernan envolvi, incluyendo e maestronan.



E cambio aki ta un fase nobo pa Enseñansa Secundario Special na Aruba y ta trece varios oportunidad. Minister Michelle Hooyboer-Winklaar ta indica cu nos ta na un crusada importante pa e desaroyo di e tipo di educacion aki na Aruba. “Esaki ta e momento pa bay formalisa varios cos y haci e cambionan necesario pa asina nos schoolnan SPO por bay opera optimalmente y brinda e alumnonan tur loke nan mester y tin derecho riba dje. Tin varios proceso ta canando hunto na e momento aki pa asina nos por completa tur cos lo mas pronto posibel”,  segun Minister Hooyboer-Winklaar.

“Banda di e proceso di independisacion cu ta wordo guia door di e stuurgroep nos tin e proyecto di e localidad nobo pa SPO Pariba cu mester start muy pronto. Nos tin e fondonan aloca y awo hunto cu DOW y Infrateam nos mester cuminsa e preparacionnan y apunta un luga adecua cu por construi e localidad nobo. Tambe e localidad di Santa Cruz tin mester di mantenemento y un posibel expansion. Nos ta bezig ta evalua tur e posibilidadnan pa despues nos envolvi tur e partner den esaki”, e mandatario di Enseñansa a bisa.


Curiculo

Un otro proceso sumamente importante ta esun di e revision di e curiculo y tur loke tin di haber cu e organisacion di e contenido di e programanan. E asina yama “inhoudelijke vernieuwing” lo tin su impacto riba ful e organisacion y facilidadnan necesario pa e schoolnan. Minister Hooyboer-Winklaar ya a señala e necesidad di amplia e cantidad di aña di estudio di 3 pa 4 of 5 aña mirando cu nos ta confronta un situacion awo cu muchanan di 15 a 16 aña ta finalisa enseñansa secundario special sin cu tin un otro alternativa cu nan por sigui studia y desaroya nan mes.

“Na januari ultimo nos a yama tur e partnernan strategico pa asina start cu e proceso aki. Esaki ta inclui e curiculo, e cantidad di aña, y e aspecto di cualificacion. Esaki pa hopi aña tambe cu a wordo papia. Mi punto di bista ta pa sigura cu e studiantenan aki termina cu un cualificacion cu ta wordo reconoci den nos comunidad sea si nan ta opta pa cuminsa traha of nan ta desea di sigui studia.” Segun Minister Hooyboer-Winklaar.

Minister ta reconoce cu tin hopi trabou pa realisa pero ta sumamente entusiasma cu e oportunidadnan nos dilanti. “E grupo di alumno aki ta hopi special y tin hopi potencial. Nos mester duna e alumnonan aki e nivel di educacion y cuido cu nan merece. Awo ta e momento pa nos bay duna forma real na Enseñansa Secundario Special na Aruba”Minister Michelle Hooyboer-Winklaar a conclui.


Info / Contact

Pa mas informacion por busca [S] Scol Practico pa Ofishi (SPO) den e alfabet menu riba homepage y/of por tuma contacto cu Dienst Publieke Scholen (DPS)

Scroll To Top
  • © 2011-2019 Department of Education Aruba (DEA)
  • T +297-528-3400
  • F +297-528-3434
  • info@ea.aw