Ultimo dia pa docente y comunidad yena e encuesta NOP 2030

November 13, 2018

Den cuadro di e Plan Nacional di Enseñansa (NOP 2030) ta conduciendo un encuesta pa maestro, docente y comunidad. Ultimo dia pa yena esakinan ta diaranson 14 di november pa 12or di merdia.



Meta di e encuesta pa docente y comunidad

Na final di aña 2017 Minister di Enseñansa Sr. dr. A.R. Lampe a encarga Departamento di Enseñansa Aruba (DEA) cu e desaroyo di e Plan Nacional di Enseñansa nobo: NOP 2030. Meta di e Plan di Enseñansa 2030 ta pa hunto cu tur stakeholder yega na un vision comun pa enseñansa na Aruba.

Recientemente durante e rondanan di consulta den e Siman di Enseñansa, cabesante di tur e scolnan na Aruba a haya e oportunidad di vocifera nan puntonan di atencion pa enseñansa y e elementonan cu nan lo kier wak bek den e vision pa Enseñansa 2030.

Docente y maestro por haci esaki tambe pa medio di e encuesta cu ta accesibel via di un ‘inlogcode’ cu nan a ricibi via e cabesante. Door di yena e encuesta aki, nan por vocifera nan opinion tocante enseñansa na Aruba y tambe ki elementonan lo kier mira bek den e vision pa Enseñansa 2030.

Enseñansa ta un proceso cu diferente actor cu ta hunga un rol crucial den e proceso. Pa e motibo akinan miembronan di nos comunidad tambe tin e oportunidad pa vocifera nan opinion tocante nos enseñansa y elementonan cu nan ta desea di mira den e vision pa 2030.

Departamento di Enseñansa Aruba ta enfoca riba e importancia di participa na e encuesta den cuadro di e Plan Nacional di Enseñansa 2030. Meta ta cu e proceso pa yega na e plan akinan ta uno, unda a scucha opinion di grupo hopi grandi di persona den e mundo di enseñansa y comunidad completo.

Pa e encuesta NOP2030 pa docente y maestro click [aki].

Pa e encuesta NOP2030 pa comunidad click [aki].

Ultimo dia pa yena e encuesta ta diaranson dia 14 di november pa 12or di merdia.


Info / Contact

Pa mas informacion por busca [N] NOP 2030 den e alfabet menu riba homepage.

Scroll To Top
  • © 2011-2019 Department of Education Aruba (DEA)
  • T +297-528-3400
  • F +297-528-3434
  • info@ea.aw