Studiantenan ta ricibi beca pa “Summer Program”

July 4, 2016

E nuebe studiantenan di Universidad di Aruba (UA) cu a ricibi un beca di 4500 florin cada uno pa atende un “summer program” den exterior tabata tin un encuentro cu Minister di Enseñansa Michelle Hooyboer-Winklaar prome cu nan a sali pa Hulanda.

Ministerio di Enseñansa a presenta un proyecto di “beca” algun siman pasa, pa cual a invita studiantenan di Universidad di Aruba pa aplica pa ricibi Afl. 4500 pa sigui un “Summer Program” den exterior. E studiantenan mester a aplica y pasa un evaluacion na Universidad di Aruba mes, unda cu e instituto di enseñansa superior a keda encarga door di Minister di Enseñansa cu e seleccion di e becadonan.

Prome cu nan salida pa Hulanda, e becadonan tabatin un encuentro cu e mandatario. Minister Hooyboer-Winklaar a bisa cu a palabra cu nan cu ora nan bolbe Aruba lo organisa un ocasion pa nan comparti nan experiencia den un presentacion na otro studiantenan.

Durante di e encuentro prome cu nan biahe a papia cu e mandatario tocante di e programanan cu nan ta bay sigui y di e ciudad unda nan ta bay. E Minister a indica cu den mundo di enseñansa na nivel superior hopi di e institucionnan no ta cera durante di e lunanan di vakantie di zomer y ta scoge pa ofrece diferente curso special di dos siman of mas largo. Tabatin hopi interes pa e becanan y e minister ta encurasha otro studiantenan pa cuminsa sondea nan opcionnan y oportunidadnan pa otro aña como cu gobierno lo ofrece e becanan aki atrobe pa na final di e aña academico 2016/2017.

E situacion aki ta beneficioso pa e studiante di Aruba, kende por haci bon uzo di e oportunidad pa siña algo nobo of algo adicional den un ambiente academico den exterior. Minister Hooyboer-Winklaar a splica cu e studiantenan ta bayendo diferente ciudad na Hulanda, incluyendo Maastricht, Utrecht y Den Haag. “E meta di esaki ta pa crea un experiencia internacional pa un studiante di Aruba. Aunke e studiante a scoge pa studia na Aruba no kiermen cu e no por participa y experencia un curso internacional”. E minister a conclui bisando cu lo kier wak mas beurs y programa di intercambio (“exchange programs”) pa asina sigui expande riba e tipo di oportunidadnan aki unda cu e studiante di Aruba toch tin un conexion internacional cu ta yuda enrikece su experiencia total di su studio.

E studiantenan tabata hopi entusiasma cu e oportunidad cu nan a haya pa por sigui un “module” den nan ramo di estudio na un institucion di enseñansa di nivel superior, sea HBO of Universidad. E 9 studiantenan ta Jochem Pennekamp, Tatiana Peña, Tracey Werleman, Jourienne Wolff, Ana Delgado Correa, Whitney Gutierrez Arrieta, Kayla Haakmeester, Etiléne Alders y Ivelisse Simon.

Jochem Pennekamp a expresa cu nan ta mira e oportunidad aki como un chens fantastico cu ta yuda den nan desaroyo academico y nan desaroyo social. E studiante di “Organization, Governance and Management” a bisa cu e ta “een geweldige kans” pa nan tur.

Tatiana Peña, kende ta studiando “Social Work and Development” a referi na e beca como “un oportunidad grandi” pa e studiantenan cu kier experencia e situacion den exterior y no tabatin e oportunidad aki den pasado. El a tum’e cu brasa habri y tabata hopi gradici pa e oportunidad. El a scoge pa haci e module “Global Justice and Human Rights” pa haya sa kico exactamente e topiconan aki ta encera y kico e trendnan cu ta influencia mundo ta actualmente.

Un otro studiante, Whitney Gutierrez Arrieta, a scoge pa atende e module “Nudging, the art of impressing people” na Haagsche Hogeschool na Den Haag. Actualmente e ta studiando Marketing na Universidad di Aruba. El a comenta cu e ta hopi contento y ta gradici e minister pa e oportunidad cu e ta dunando e studiantenan pa medio di e beca special.


Minister di Enseñansa
a keda contento cu e encuentro cu e studiantenan y a pidi nan pa ora nan bolbe nan comparti nan experiencia cu nan coleganan na Universidad. E Minister a splica cu e intencion ta pa ofrece e becanan aki atrobe na fin di e aña academico 2016-2017 pa e studiantenan haya un experiencia internacional durante di nan estudio na Aruba.

Minister Hooyboer-Winklaar ta encurasha studiantenan cu ta desea di ricibi un di e becanan otro aña pa cuminsa sondea e oportunidadnan cu tin pa atende un “summer program” den exterior.

 


Info | Contact

Pa mas informacion por busca den e alfabet menu riba homepage: [University of Aruba] of por tuma contacto cu: [University of Aruba].

Scroll To Top
  • © 2011-2019 Department of Education Aruba (DEA)
  • T +297-528-3400
  • F +297-528-3434
  • info@ea.aw