Studiantenan entusiasma cu cursonan di Academy of Fine Arts Aruba

February 26, 2016

Recientemente studiantenan di Academy of Fine Arts Aruba a completa un fase mas den nan desaroyo y exploracion di diferente disciplina di arte, cual a encera un video como producto final.

Rebecca Roos, kende ta un filmmaker local cu a traha na Hulanda y tin un trayectorio extenso den e ramo di traha documentario, como tambe trabaonan comercial y pelicula, tabata e facilitado pa e curso.

Un di e studiantenan, esta Mikelle Semeleer a splica cu Roos a duna nan como tarea final pa haci uzo di video y, en realidad, imagennan cu ta move, como e medio for di cual nan ta traha un piesa di arte.

Angie Gonzalez, kende tambe ta participando na e pre-course pa prepara pa aplica na un scol di arte internacional, a categorisa e curso como un “amazing experience” y un di e partinan cu mas e tabata sperando riba dje for di cuminsamento di e curso. Gonzalez a bisa cu su deseo ta pa sigui un carera den e ramo di filmacion, particularmente pa filma video di muziek.

El a presenta un piesa cu a hiba e nomber “awkward distortion”, unda cu el a ilustra bida diario di un hoben masculino. El a mustra con e cosnan di mas normal ta bira “awkward” ora cu nan ta wordo haci den bista di tur hende. El a bisa cu el a siña hopi; el a traha cu e metodo cu Roos a siña nan di traha un “story board” y a haci uzo di bailadonan cu kende e ta traha. Angie Gonzalez a splica cu el a gusta e otro cursonan tambe, incluyendo pintamento y traha paña.

E studiante T. Blancheville a muda pa Aruba pa atende Academy of Fine Arts Aruba como cu e a scoge arte como su carera y kier a pone un bon base pa aplica na un scol di arte internacional cu un portafolio bon traha. Produccion di un bon portafolio ta hustamente e meta di e pre-course. Blancheville a bisa cu Rebecca Roos a duna nan e reto pa mira “diep” den nan mes y traha e video basa riba loke nan ta sinti/mira. E ta haya un reto asina ta loke ta haci e curso “great”, e oportunidad pa siña mas.

 


Info / Contact

Pa mas informacion por busca den e alfabet menu riba homepage: [M] Ministerio di Enseñansa

Scroll To Top
  • © 2011-2019 Department of Education Aruba (DEA)
  • T +297-528-3400
  • F +297-528-3434
  • info@ea.aw