Studiantenan di IPA a tene exposicion di proyecto social

May 17, 2019

Den cuadro di finalisacion di e estudio pa bira maestro di scol e studiantenan di Instituto Pedagogico Arubano (IPA) di ultimo aña mester haci un investigacion y un proyecto social.


E investigacion ta pa nan tesina di finalisacion di estudio (afstudeerproject) y e proyecto social ta na bienestar di un instancia, grupo of comunidad en general. Di e delaster aki nan mester haci un presentacion cu ta husga como parti di e examen final.

E presentacion lo ta den forma di un exposicion caminda nan ta presenta nan proyecto na e docentenan di IPA, e instancianan y na publico en general.

E proyecto social ta hopi importante den cuadro di e desaroyo como docente y “agente social”, esta como persona clave den nos comunidad Arubano cu ta participa y contribui activamente den e desaroyo social y cultural di nos pais.

E aña aki nos studiantenan ta presenta varios proyecto y topico interesante cu nan a elabora y traha riba conhuntamente cu e instancianan social na Aruba.

Studiantenan Ealeen Ferro y Chantalle Giel a traha conhuntamente cu The Butterfly Farm pa yuda cu e proceso di informa e comunidad tocante e importancia di nos naturalesa y nos barbulet Monarca.

Nan meta tabata pa duna informacion tocante ciudo di naturelesa y importancia di e barbulet Monarca. E grupo meta pa cu esaki tabata alumnonan di scol basico. Cu nan Expo, nan a yuda hiba e mensahe “Save the milk plant to save the Monarchs” na e comunidad di Aruba.

Studiante Jeaniree Franken a scoge pa traha cu instancia Club Kibrahacha 60+. E instancia  aki ta ofrece diferente actividad recreativo cu ta yuda den bida diario di su clientenan cu ta 60+.

Pa e motibo aki a opta pa yuda organisa un siman di tayer na unda tecnologia ta para central. E clientenan a siña poco mas tocante tecnologia, e beneficio di esaki pa nan como persona y con pa haci uzo di dje.

Studiante Gislaine v/d Linde y Yuryenne Arends a scoge pa traha cu Luna Foundation. E meta di e fundacion aki ta pa conscientisa e futuro generacion tocante e importancia di un bon cuido di bestia.

E studiantenan conhuntamente cu Luna Foundation a yega na e idea pa traha un serie di les pa klas 2 (cyclo 1) y klas 6 (cyclo 2) p’asina e maestronan di e klasnan menciona por uza pa conscientisa nos muchanan tocante entre otro: un bon cuido di bestia y bestianan di caya, kico tur esaki ta hiba cu ne pa nos salud, e importancia di trabou boluntario, sterilisacion y castracion.

Studiantenan Lianne Tromp y Gereline Werleman a scoge pa traha hunto cu Space and Nature Aruba Foundation.  E meta di e fundacion ta pa brinda e comunidad di Aruba cu informacion tocante astronomia y nos naturalesa.

Pa e proyecto social nan a traha un serie di les cu informacion di astronomia y naturalesa di Aruba pa muchanan entre e edad di 4-8 aña. Tambe nan a diseña dos wega p’ asina den un manera atractivo e muchanan di e edad mas jong por siña tocante e temanan aki.

Studiante Sandra Guzman y Shamaira Rodriguez a acerca Fundacion Respeta Mi. E tema e aña aki tabata Negligencia Emocional. E ta algo cu ta pasando alarmantemente den nos comunidad awendia.

Nos muchanan ta wordo neglisha emocionalmente door di e influencia di tecnologia, mayornan tin cu traha dos trabao of ta papia inconcientemente di un manera no apto cu e mucha. E mucha cu ta wordo neglisha emocionalmente por tin cierto comportacionan na scol. Un mucha tin derecho di haya amor, cuido, cariño y atencion.

E studiantenan a dicici di traha un poster caminda tin tur informacion pa maestronan di reconoce e señalnan cu un mucha por trece dilanti den klas, di e forma aki e maestro por yuda e mucha.

IPA kier gradici tur e instancianan cu a brinda e studiantenan e oportunidad pa haci nan proyecto social cu ta un parti obligatorio di e programa di IPA.


Info / Contact

Pa mas informacion por busca [I] Instituto Pedagogico Arubano (IPA) den e alfabet menu riba homepage of por tuma contacto cu IPA

Scroll To Top
  • © 2011-2019 Department of Education Aruba (DEA)
  • T +297-528-3400
  • F +297-528-3434
  • info@ea.aw