Studiantenan a yega Hulanda bon

July 31, 2016

Den Haag – Cu tres vuelo di KLM a yega awe 31 di juli un cantidad di 210 studiante di Aruba pa sigi un estudio avansa na nivel HBO of Universidad na Hulanda. Na Schiphol e studiantenan a keda ricibi pa un delegacion consistiendo di Minister Plenipotenciario di Aruba Alfonso Boekhoudt, directora di Gabinete di Aruba Shandra John, functionarionan di afdeling onderwijs di Gabinete di Aruba, studiementoren y miembronan di e Plaatselijke Opvang Commissie (POC).

Sr. Boekhoudt tabata na e gate pa saluda e studiantenan na momento cu nan a sali for di e avion. Pafor den e sala di yegada e studiantenan a keda ricibi na un forma bon organisa y a haya instruccion di personal di Cas di Aruba y miembronan di e POC unda nan mester para den grupo pa warda nan turno pa bay na e bus cu lo hiba nan na nan cuidad di estudio.

Contrario na e preocupacionan cu tabata tin relaciona cu e 3 extra estadia na hotel na Groningen y Leeuwarden, esaki a ser paga door di Gabinete di Aruba, cargando esaki parcialmente riba e lening di e studiantenan.

Opvang

Dialuna dia 1 di augustus e studiantenan lo cuminsa cu e programa di “opvang” obligatorio, cual lo dura tres dia. Na comienso di e programa aki lo pasa un video den cual Minister Plenipotenciario Alfonso Boekhoudt ta yama e studiantenan bonbini. E minister ta bisa cu nan a bin studia na un pais cu otro custumber y idioma, cu e studiante lo enfrenta retonan, sigur den e prome aña. “Bo mester saca afor si e estudio cu bo a scoge ta esun bon pa bo. Hopi preguntanan cu bo por tin den bo cabes. No cana rond cu nan, pero acerca bo mentor. Haci amistad cu Hulandesnan, pa asina siña mas y alabes esaki por yuda bo domina e idioma Hulandes hopi mas mihor” asina Boekhoudt a bisa den su mensahe den e video.

Tambe e video ta contene un parti na unda directora di Gabinete di Aruba Shandra John ta duna e studiantenan algun tips, manera pa nan corda na lesa nan correspondencia di Gabinete di Aruba. Tambe pa nan ta cuateloso pa firma contractnan di companianan cu ta acerca nan ariba caya of via email.

Budget

Sra. John a bisa den su mensahe cu e studiantenan e aña aki a ricibi un suma grandi for di Aruba pa cubri nan gastonan pa un periodo largo. “Corda bay bon cu boso budget y no uz’e den un solo biaha, pa asina bo no haya bo cu problema financiero. Tambe nos ta conseha pa cana tur momento cu e carnet di seguro. Pa asina si algo pasa, nan por mira cu boso ta segura“.

Guia

E prome aña e studiante ta ricibi guia di e studiementor, pero pa e resto di su estudio e ta cay bou di Gabinete di Aruba. Functionario di Afdeling Onderwijszaken di Gabinete di Aruba Ivonne Navas den e video ta mustra e studiante riba e Facebook di Onderwijszaken unda nan por keda na altura di loke ta pasando. Tambe via di Facebook nan por haci un pregunta of duna nan comentarionan.

Seguro

“Tambe un peticion na nos studiantenan pa bishita e website arubastudent.com pa informacion relevante tocante di nan seguro. Boso a firma un contract pa un prestamo di estudio (Arubalening) cu ta otro cu e studiantenan di aña pasa. Lesa boso contract bon pa asina boso ta na haltura di kico ta para den dje” segun conseho di Ivonne Navas na e studiantenan.

Na final di e video Minister Plenipotenciario Alfonso Boekhoudt ta bisa cu e ta spera cu e informacion brinda lo contribui na exito di e estudio y cu e diploma na final ta un sentido di orguyo pa nan mes, nan famia, pero tambe pa Aruba.

Reportahe fotografico

Riba e website di Arubahuis tin un reportahe fotografico extenso di e yegada di e studiantenan.

 

 


Info | Contact

Pa mas informacion por busca den e alfabet menu riba homepage: [Studia na Hulanda] of por tuma contacto cu: [Kabinet van de Gevolmachtigde Minister van Aruba – Arubahuis]

Scroll To Top
  • © 2011-2019 Department of Education Aruba (DEA)
  • T +297-528-3400
  • F +297-528-3434
  • info@ea.aw