Studentenhuisvesting Leiden, Delft y Den Haag-techniek

October 25, 2019

Den Haag – Arubahuis ta brinda informacion di vivienda pa studiantenan cu kier bay studia na Leiden, Delft of Den Haag otro aña.


Studentenhuisvesting Leiden, Delft, Den Haag

Provincie Zuid-Holland: Leiden, Delft, Den Haag


Un acontecimiento cu tur aña ta riba agenda ta e yegada di e grupo grandi di hobennan cu kier sigui un estudio avansa na Hulanda. Pa e region di Leiden, Delft y Den Haag – cu ta hopi popular cerca studiantenan Arubiano – e aña aki a bin mas o menos 80 studiante. Mentor di Arubahuis pa Leiden, Delft y Den Haag-techniek, Solange Quandus, ta duna pa medio di e articulo aki informacion di vivienda pa studiante pa e ciudadnan menciona.

Prome cu yega Hulanda tin hopi preparacion y asuntonan cu mester wordo regla. Un di e asuntonan importante ta vivienda. Pesey ta importante cu e hoben cu pa otro aña kier bay Hulanda cuminsa busca awor aki caba un camber. Esnan den voorexamenklas (4 havo en 5 vwo) y cu tin pensa di bay studia tambe por inscribi caba. Mas tempo bo tin inscribi, mas halto bo chens ta pa haya un vivienda. Haciendo esaki na tempo por resulta cu bo por haya un camber pagabel y kisas conforme bo gusto ora cu bo yega Hulanda.

Mester menciona cu e aña aki nos a ripara cu apesar di e scarsedad, basta studiante di Aruba cu a bin studia den e region di Den Haag, a haya camber prome cu nan a yega Hulanda of den e prome luna cu nan ta akinan. Esaki ta debi cu na prome lugar hopi studiante a inscribi na tempo na diferente instancianan. Tambe entrante e aña aki tin instancianan cu ta aplica un asina yama “voorrangsregeling” pa studiantenan internacional.

Esey kiermen cu tur “eerstejaarsstudenten” den e lunanan di juli, augustus y september ta haya preferencia pa un camber ora esey bira liber.

Aki ta sigi un resumen di algun instancianan unda por inscribi pa un camber.


Leiden

DUWO
DUWO ta specialisa den vivienda pa studiante y ta opera den varios ciudad. E costo pa inscribi ta €35 y ta valido pa 8 aña. Por cuminsa inscribi asina bo hasi 16 aña. Pa por paga e inscripcion mester di un credit card of paga via IDEAL.
Website: duwo.nl

Kamerraad
Pa inscribi na kamerraad mester manda un email na info@kamerraad.nl. Den e email mester splica cu bo ta bin di Aruba y bo ta duna bo preferencianan pa un camber/vivienda. Kamerraad lo mandabo un email bek cu un link pa paga e inscripcion. E costo pa inscribi ta €35 y ta valido un aña.
Website: kamerraad.nl


Delft

DUWO
Check e informacion ariba

TU Delft
Un opcion pa haya un camber na Delft ta via e “housing service” di TU Delft. E servicio aki ta pa studiantenan (Internacional) cu a obtene nan diploma den exterior. E studiante Arubiano tambe ta cay den e categoria aki. Ora cu inscribi pa un estudio na TU Delft, mester laga sa si kier hasi uso di e servicio aki. E costo di e servicio ta €228 y e deadline pa inscribi ta 1 april 2020.

Rooming
Website: rooming.nl

Tambe via Facebook ta hopi comun pa haya un camber na Delft. Por check por ehempel e siguiente pagina: Find a room(mate) in Delft.


Den Haag

DUWO
Check e informacion ariba

THUAS Housing
Website: thehagueuniversity.com

Haagse Hogeschool
Haagse Hogeschool ta ofrece servicio di vivienda pa studiantenan international. Esaki ta conta tambe pa studiante Arubiano, mientras cu nan tin un adres y ta inscribi na Aruba. E studiante ta registra den “Studielink” pa un estudio na Haagse Hogeschool. Haagse Hogeschool, despues di haci un seleccion di studiantenan international, lo tuma contacto cu e studiante pa wak si nan ta interesa den un camber.  E servicio aki ta costa €250. Pa mas informacion por manda un e-mail na: accommodation@hhs.nl

Staedion
Staedion ta un woningcorporatie cu tambe tin camber pa studiante. Inscripcion ta gratis. Pa por reacciona riba un camber/studio mester upload prome e “bewijs van inschrijving” di e onderwijsinstelling na unda bo ta bay studia. Dus por inscribi awor caba, pero otro aña ora bo tin e bewijs por cuminsa reaciona riba e oferta aki.
Website: staedion.nl

Vesting Vastgoed
Vesting Vastgoed ta un makelaar cu ta opera den Den Haag y vecindario. Nan tin camber pa studiante, pero tambe studio y appartemento mas caro. Inscripcion ta gratis. Mester tene cuenta cu ta cobra “borg” y “bemiddelingskosten”.
Website: vestingvastgoed.nl

Otro websitenan unda por inscribi tambe:

Aunke Arubahuis y/of e mentornan no ta encarga ni tampoco ta responsabel pa busca un vivienda pa e studiante, nos ta informa y guia e studiante entre otro, den e proceso di busca un vivienda. Tambe un conseho di Solange ta cu ora bo haya un camber, lesa e contracto di huur bon prome cu firma. Y si tin cosnan cu no ta hopi cla busca ayudo y mas informacion pa despues bo no haya bo cu sorpresanan desagradabel.


Contact Mentor

Pa mas informacion of pa cualkier pregunta relaciona cu Leiden, Delft y Den Haag-techniek por tuma contacto cu:

Mentor Solange Quandus

Mobiel of Whatsapp: +31(0)6 8486 5675

Email: s.quandus-mentor@arubahuis.nl


Info / Contact

Pa mas informacion por busca [S] Studia na Hulanda den e alfabet menu of por tuma contacto cu Kabinet van de Gevolmachtigde Minister van Aruba (Arubahuis)

Scroll To Top
  • © 2011-2019 Department of Education Aruba (DEA)
  • T +297-528-3400
  • F +297-528-3434
  • info@ea.aw