Search Facebook Instagram Twitter

Resultado di proyecto anti-bullying

September 1, 2016

Na aña 2000 Telefon pa Hubentud a cuminsa cu su proyecto anti-bullying, esta anti-termento, cual den transcurso di añanan a sigui desaroya di un programa p’afo di scol pa un programa apto pa uzo cu e triangulo di e scol, esta e docente, e hoben y e mayor.

A logra drenta ocho scol piloto hunto cu Centraal Bureau voor de Statistiek (CBS) pa introduci e programa. CBS a midi e situacion prome cu a cuminsa cu e proyecto, y despues cu a cera e periodo piloto y e resultadonan ta papia pa nan mes. “E programa aki a haci “bullying” un topico cu ta “bespreekbaar”, pues cu por papia abiertamente encuanto di dje y a yuda den su prevencion.

E resultadonan di CBS ta mustra cu e efectonan di e programa ta significante. Pa medio di aplicacion di e proyecto anti-termento na e scolnan a mira un reduccion di mas of menos 22% den e cantidad di studiante cu ta haya nan mes den situacionnan di termento,” Minister di Enseñansa Michelle Hooyboer-Winklaar a declara.

Ministerio di Enseñansa ta un di e instancianan cu a yuda den financia y facilita e programa pa su entrada den scolnan y Minister Hooyboer-Winklaar ta contento cu e efecto y impacto di e proyecto. E mandatario ta boga y ta sostene e expansion di e proyecto cual ta bay wordo ofreci proximamente na tur scol basico.

Telefon pa Hubentud a diseña e proyecto cu e meta specifico pa “pak aan”, preveni y soluciona e situacion di termento bao di muchanan y hubentud cu den algun caso por mira cu e ta sigui crece y bira un situacion structural, y traumatico.

Un elemento hopi importante di e proyecto ta e oportunidad y e ocacion cu e ta brinda pa habri e combersacion encuanto di bullying. E ta un tema hopi delicado cu hopi hende no por of no kier papia di dje, tin hende cu ta sinti nan hasta “aangesproken” cu nan no ta haci suficiente pa preveni of resolve e situacionnan envolviendo bullying.

E programa di Telefon pa Hubentud ta yuda kita e drempel aki, y ta encurasha e combersacion, y envolvimento pa yega na solucionnan; e  ta duna espacio pa studiantenan expresa nan mes y ta duna instrumentonan pa contribui na minimalisa bullying, Minister Hooyboer-Winklaar ta agrega.

E resultadonan di e sondeo di CBS ta mustra pues cu algo efectivo por wordo haci contra bullying, y e programa ta disponibel pa tur scol uza.

Minister Hooyboer-Winklaar a bisa cu apesar di programanan por pasa cu bullying ta sigui existi, y no solamente na scolnan, pero tambe na trabao, y esaki ta pasa pasobra hopi biaha, segun estudionan, e actornan envolvi no sa kico pa haci. E responsabilidad pa actua ta keda schuif entre cabesante, maestro y schoolbestuur, y hopi biaha ta wak tambe cu tin miedo pa keda envolvi.

E proyecto di Telefon pa Hubentud ta duna e instrumentonan kico por haci pa crea un ambiente unda cu bullying no por sigui biba, Minister Hooyboer-Winklaar a conclui bisando.

 


Info / Contact

Pa mas informacion por busca den e alfabet menu riba homepage: [M] Ministerio di Enseñansa

Scroll To Top
  • © 2011-2023 Department of Education Aruba (DEA)
  • T +297-528-3400
  • F +297-528-3434
  • info@ea.aw

By orbitalnets