Search Facebook Instagram Twitter

Renobacion na Ayo Kleuterschool y Maria Goretti College

September 19, 2017

Ayo Kleuterschool y dependance di Maria Goretti College a ricibi bishita di Minister di EnseñansaMichelle Hooyboer-Winklaar pe entregamento di e proyecto cu a keda realisa na e scol.

E bishita tabata uno agradabel specialmente unda a conta cu e presencia di Minister Hooyboer-Winklaar alabes e muchanan tambe a disfruta di esaki. E muchanan di kleuter y Maria Goretti College a duna Minister un bon bini caluroso.

 

Cabesante Mirla de Cuba-Tromp

 

Cabesante di Ayo Kleuterschool y dependance di Maria Goretti CollegeMirla de Cuba-Tromp a conta cu e structura di e scol ta cu nan ta cay bou di SKOA, di cual tin e kleuterschool.

E scol aki ta un mescla di grupo, di cual tin e muchanan di grupo chikito y grupo grandi. Tambe tin 2 klas di 5de di Maria Goretti College. Pa loke ta e scol di Maria Goretti College, na Paradera tin e klasnan di 1ste te cu 4de y e muchanan ta bay Ayo pa 5de y despues ta bin bek Paradera pa ta den 6de klas.

E proyecto di renoba e scol a cuminsa un poco mas cu un aña pasa, unda Minister a haci un bishita na e scol y aki el a ripara cu e cura practicamente no tabata existi mas.

Minister Hooyboer-Winklaar a mira e necesidad pa drecha esaki, pasobra mester a brinda e muchanan chikito e siguridad. Pa sorpresa di e scol Minister a bisa cu lo cuminsa cu e proyecto pa drecha e cura.

Na final di aña pasa e scol tabatin un cura nobo y bunita. E cura ta completamente di beton cu hero y despues cu esaki a keda cla, e edificio mes a keda atras cu bentananan kibra.

 

 

Tambe e edificio tabatin mester un verf y e mandatario a tuma over e proyecto aki, cual a cuminsa na Augustus 2017. E trabou a bay den un tempo hopi cortico y e proyecto ta cla, unda cu nan a cambia e bentananan pasobra prome e scol tabatin e bentananan di palo.

Na luga di bentana di palo awo e scol tin bentana di aluminio y e edificio ta completamente geverf. “Nos ta hopi orguyoso di esey“, asina Mirla de Cuba-Tromp a duna di conoce.

E cabesante a gradici Thiel y Britten di BIC, kendenan tabata encarga cu e construccion di e cura. Tambe a agradici contratistanan Angelo Arends Mario Arends pa cambia e bentananan, verf e scol, cambia e verlichting, etc.

E scol ta hopi agradecido p’e resultado di e proyecto. Nan no por a lubida Danny Maduro di Departamento di Enseñansa Aruba cu a sostene e proyecto aki y Minister Hooyboer-Winklaar.

 

 

 


Info / Contact

Ministerio di Enseñansa

Scroll To Top
  • © 2011-2023 Department of Education Aruba (DEA)
  • T +297-528-3400
  • F +297-528-3434
  • info@ea.aw

By orbitalnets