Renobacion di cura pa 4 scol

August 8, 2016

Minister di Enseñansa ta informa cu recientemente a aproba e proyecto pa renobacion di cura pa 4 scol. Dienst Openbare Werken (DOW) a traha overtime pa por a cumpli cu e fecha cu Fondo Desaroyo Aruba (FDA) a stipula. E proceso pa e destaho publico a dura mas o menos 3 luna.

 

Minister Hooyboer-Winklaar ta contento di por cuminsa cu e ehecucion di e proyectonan aki y cu e sosten cu el a haya di Fondo  Desaroyo Aruba (FDA) y di Dienst Openbare Werken (DOW).

Iris Gil, Project Manager di DOW a añadi e 4 scolnan cu lo ta Pius X Scol na Dakota, SPO na Santa Cruz, Ayo School na Paradera y Cacique Aterima na Santa Cruz. Pa e proximo aña escolar e scolnan aki lo tin cura. E trabounan lo mester wordo entrega prome cu fin di aña, Gil a enfatisa.

E compania C2 Civil & Construction a gana e destaho publico pa ehecuta 3 di proyectonan aki y BIC N.V. a gana e destaho publico pa e cura di Ayo Kleuterschool.

E fecha di entrega pa e proyectonan aki ta stipula door di DOW y FDA y ta mas o menos 3 pa 4 luna.​

 

Cabesantenan contento cu renobacion

Maritza Carrion ta Cabesante na Scol Preparatorio Cacique Aterima Santa Cruz y e ta hopi contento di por ta e cabesante di un di e scolnan cu lo haya un cura renoba pa e periodo escolar aki. El a indica cu e tin 16 aña trahando na e scol aki y e cura ta e prome cos cu a bay atras na nan scol. Pa varios aña, e cabesante anterior y e mes a pidi pa un renobacion di e cura. Esaki pa nan ta hopi importante. Pa por haci cosnan bunita na scol, pone mata of colga cosnan ariba muraya ta hopi dificil pasobra tin malhechornan cu ta drenta den cura di scol y ta haci desaster, a bisa. Na varios momento a yega di haya cosnan y hendenan no desea riba tereno di scol. Pesey ta hopi importante pa e scol, pa e muchanan, e mayornan y pa tur hende por tin algo mas safe y bunita.

 

Magda De Haseth-Croes, Cabesante di Maria Goreti y Ayo Kleuterschool a expresa cu e cura pa scol ta nifica e siguridad di e muchanan. E mester t’ey na su luga pa e muchanan chikito keda paden sin tene un bista di unda nan ta bay. Ademas cu esaki ta preveni cu hendenan cu no ta suppose di subi tereno ta subi tereno. Alabes cu esaki por laga cierto cosnan pafo y decora sin cu antisocialnan ta cana kibra sin cu tin mester. El a agrega cu esaki ta su di 9 aña y tur aña el a pone como un prioridad den su presupuesto. Aworaki e cura ta full abao y esaki sigur cu nan ta aprecia masha hopi mes.

 

Meneer Leocadia ta representa Pius X Scol y e renobacion di e cura di scol ta masha significativo mirando e bario den cual nan ta situa. Tin hendenan cu ta cana rond y cu constantemente ta drenta den cura di scol locual ta bira insigur tambe pa e muchanan. Recientemente a drenta scol y corta e cranchi di awa locual ta keda hopi fastioso vooral pa e muchanan cu ta yega scol y no tin awa pa nan, meneer Locadia a subraya. “Aworaki ta hopi importante y nos ta hopi contento”. Pius X Scol tin mas o menos 5 aña wardando riba e renobacion aunke di nan banda a keda haci un tiki, pero automaticamente e trabounan mas grandi mester wordo haci.

 

Finalmente, Marc Thiel, Director adhunto di SPO Santa Cruz y Savaneta ta di opinion cu e renobacion di e cura ta hopi importante pa e siguridad di e muchanan, di nan team como di e area unda e scol ta situa. “Nos ta contento cu poco poco tin cambionan tumando luga”.

Minister Hooyboer-Winklaar dentro di poco lo cuminsa mira e avancenan di e obranan pa asina fin di aña por conta cu 4 scol cu nan cura ful renoba.

 


Info / Contact

Pa mas informacion por busca den e alfabet menu riba homepage:  [F] Faciliteiten  of [O] Onderhoud Scholen.

Scroll To Top
  • © 2011-2018 Department of Education Aruba (DEA)
  • T +297-528-3400
  • F +297-528-3434
  • info@ea.aw