Search Facebook Instagram Twitter

Renobacion Arco Iris Kleuterschool casi completa

June 28, 2016

Minister di Enseñansa, Michelle Hooyboer-Winklaar recientemente a bishita e proyecto di renobacion y ampliacion di Scol Preparatorio Arco Iris.

E infrastructura di e scol cu ta consisti di ocho klas di nivel kleuter tabata den un estado unda cu a presenta cierto peligernan pa e usuarionan y algun aña pasa e dicidi di muda e scol cu urgencia.

Na januari ultimo e contratista Freman, bao supervision di Dienst Openbare Werken (DOW) a cuminsa cu e trabao pa renoba Scol Preparatorio Arco Iris.

Bouwkundig Ingenieur Jaime Winterdaal ta encarga como project manager di parti di Freman y a splica den ki fase e construccion ta actualmente. E preparacion pa cuminsa traha riba e proyecto a tuma mas of menos tres luna, incluyendo e periodo di destaho public.​

A haya algun situacion imprevisto durante di e renobacion, pero Freman ta trahando duro pa sigui riba e schedule pa nan keda cla na september proximo, Winterdaal a remarca. El a bisa cu e meta ta keda mescos, pa caba na september pa asina despues di e vakantie di oktober e mudansa ta completo y scol por cuminsa bek na tempo den e edificio renoba.

E project manager di DOW, esta Eric Vrolijk a agrega cu e scol ta hayando un renobacion completo, for di vloernan pa dak; a baha dak, ta cambiando, drecha e bañonan, y mucho mas. E proyecto ta mas of menos mita caminda, e contratista ta bezig cu e dak y ta yegando e punto mas halto den algun dia.

Durante di e bishita, e mandatario a haya un bon bista riba e progreso di e trabao, y tabata satisfecho pa tende cu e combersacion entre e scol, e contratista y DOW ta sigui habri y asina ta logrando adaptacionnan desea pa e scol, cual ta duna realce na nan esfuersonan y desenbolbimento.

Ta un hecho cu e contacto y relacion entre e scol y e contratista ta uno beneficioso. E scol ta keda altanto di e progreso di e construccion y tin su “input”, di otro banda e contratista tin e oportunidad pa tuma contacto cu nan tambe tocante di detayenan di e trabao cu nan tin necesidad di consulta tocante di dje. A inclui e scol den ful e planning, Minister Hooyboer-Winklaar a agrega, cu esaki ta duna un miho resultado pa tur hende keda contento cun’e.

Un elemento cu Minister Hooyboer-Winklaar ta menciona cu ta un necesidad na hopi scol, pero nan no tin’e ta un espacio cu ta wordo uza pa “lerarenkamer” of “koffiekamer”. E contacto entre docentenan ta hopi importante, y nan mester di un espacio pa por ta hunto, cual ta stimula miho colaboracion y interaccion.

Minister Hooyboer-Winklaar ta splica cu den tres aña di tempo tabatin un inversion total di mas of menos 25 miyon florin den scolnan, y tin un cantidad di scol ainda riba lista pa ricibi un renobacion, mantencion y/of expansion. For di e 83 scolnan cu tin na Aruba, un 70% ta traha den añanan 1950/1960, y e retonan pa falta di renobacion y mantencion periodico, ta grandi.

Anteriormente e mandatario a anuncia caba cu ta studiando otro formanan pa yega na e fondonan necesario. Tin otro modelonan financiero cu lo por wordo aplica, y ta buscando entre otro e solucion den un forma di PPP (Private – Public Partnership).

Pa yega na un forma diferente di financiamento ta considerando tur gasto cu ta haciendo actualmente, manera e sumanan di huur pa reubica e scolnan, y ta haciendo inventarisacion di exactamente kico e gastonan ta di e diferente proyectonan, Minister Hooyboer-Winklaar a conclui bisando.

 


Info / Contact

Pa mas informacion por busca den e alfabet menu riba homepage:  [F] Faciliteiten  of [O] Onderhoud Scholen.

Scroll To Top
  • © 2011-2023 Department of Education Aruba (DEA)
  • T +297-528-3400
  • F +297-528-3434
  • info@ea.aw

By orbitalnets