Pregunta y Contesta PSML

Aki por haya contesta riba e preguntanan mas haci tocante Scol Multilingual.


Con por siña Papiamento na scol? Papiamento ta un idioma oficial anto?

E contesta ta: si!
a) Papiamento ta un di e dos idiomanan oficial na Aruba desde aña 2003
Aki por download e [=] Landsverordening officiële talen – 21 mei 2003
b) Papiamento tin un ortografia oficial desde 1976 y un ortografia amplia oficial desde aña 2009.
c) Papiamento ta un “idioma”, mescos cu tur otro idioma, cu su vocabulario, su gramatica y su reglanan di ortografia


Unda por haya mas informacion tocante (uzo corecto di) Papiamento?

Riba e website www.papiamento.aw por haya mas informacion tocante ortografia y gramatica di Papiamento. Aki bo por lesa mas informacion general tocante Papiamento y por download un lista di palabra segun e ortografia amplia di 2009. Tambe bo por download un lista di publicacion na Papiamento y bo por lesa mas informacion scientifico tocante e idioma Papiamento.


Si introduci Papiamento na scol, esaki lo bay stroba desaroyo di Hulandes?

Al contrario! Un bon dominio di Papiamento ta un condicion pa un bon dominio di Hulandes. Den e scol multilingual e alumno ta siña Hulandes den un forma agradabel desde edad di 4 aña. E ta desaroya su conocemento di palabra y nan nificacion na Papiamento y na Hulandes. E ta siña lesa na Papiamento y despues tambe na Hulandes. E ta sigui desaroya su conocemento di gramatica y su habilidadnan di scol na Papiamento y na Hulandes. Asina ora e alumno haci e stap pa bay cuminsa uza Hulandes como idioma di instruccion, e lo haci esaki cu hopi mas confiansa propio y cu un fundeshi mucho mas fuerte.


Con e scol multilingual ta prepara e alumno pa bay studia afo?

Siñando tur 4 idioma y stimulando e alumno pa no siña solamente fo’i cabes, pero pa compronde tambe loke e ta siña y compara esaki cu loke e sa caba, e alumno ta ricibi un caha yen di herment pa e por sigui desaroya su mes den su futuro estudio, sea na Aruba mes of den exterior. Den e scol multilingual e alumno ta siña di trempan pa haci bon uzo di diferente medio na diferente idioma – manera television, computer of buki – pa e por siña cos nobo. Unabes cu e alumno yega e edad cu e ta scoge su futuro carera escolar, e alumnonan cu a ricibi e fundeshi multilingual lo ta miho prepara pa por scoge un di e tantisimo estudionan na Ingles, pero tambe pa por scoge un estudio na Aruba mes of den exterior na sea Papiamento, Hulandes of Spaño.


Un mucha chikito por siña 4 idioma pareu?

Aruba ta un isla multilingual. E modelo ta refleha nos situacion. E cuater idiomanan mas uza na Aruba ta den e modelo. Nos muchanan ta multilingual caba prome cu nan drenta scol preparatorio. Loke e scol multilingual ta haci, ta sigui desaroya e multilingualismo cu e mucha ta bin cu ne. Sinembargo no ta e idea pa pone un peso demasiado grandi riba nos chikitinnan. P’esey ta cuminsa na un manera simpel y agadabel pa den forma di wega stimula cu e muchanan por sigui desaroya nan conocemento di e 4 idiomanan Papiamento, Hulandes, Ingles y Spaño.


Con ta percura pa nos muchanan por siña Hulandes si casi nan no ta schuch’e pafo di scol?

Di e idiomanan stranhero Hulandes ta esun cu ta haya mas ora di dedicacion desde trempan. E motibo pa esaki ta cu pa gran mayoria (94%) di nos muchanan, Hulandes ta un idioma cu casi nan no ta tende pafo di scol.

Aunke cu e muchanan ta siña Hulandes den un forma di wega, cu hopi actividad y material concreto, ta ofrece un structura y un secuencia sistematico den e lesnan di Hulandes. Asina ta percura pa por logra e meta cu tur alumno por tin un vocabulario di mas di mil palabra na final di scol preparatorio. Despues ta sigui amplia e vocabulario aki den scol basico. Ta ofrece Hulandes den un ambiente rico di estimulo y den forma interactivo cu ta duna e alumno e oportunidad di desaroya un actitud positivo pa e idioma.


Dicon a scoge pa Papiamento como idioma di instruccion te klas 4?

Idioma tin diferente funcion. Idioma ta un medio pa bo expresa bo mes, pero tambe e ta un herment pa bo pensa. E dos funcionnan  di idioma aki ta hopi importante pa siñamento. Mundo di awendia ta exigi studiante cu por rasona, compronde, duna su opinion, cu por aplica loke el a siña y cu por ta creativo cu locual el a siña. Ademas ta pidi di e mucha cu e por comunica bon, pasobra trahamento den team ta hopi importante tanto den estudio como den trabou  awendia.

Concluyendo pues, pa por ofrece enseñansa cu sentido mester uza un idioma cu e mucha ta compronde bon y den cual e por expresa su mes bon. E idioma di comunicacion cu e gran mayoria di nos muchanan ta domina bon ta Papiamento, sea cu nan a siñ’e na cas of cu nan a siñ’e pafo di cas, por ehempel na crèche of den combersacion cu nan famia, amigo of bisiña.

Scroll To Top
  • © 2011-2018 Department of Education Aruba (DEA)
  • T +297-528-3400
  • F +297-528-3434
  • info@ea.aw