Presencia di Arubahuis na College Fair tabata crucial

November 9, 2018

Den Haag – Minister Plenipotenciario Guillfred Besaril a presencia e apertura di e Aruba College Fair diabierna 2 di november na Renaissance Convention Center.

Akinan e mandatario a wordo ricibi pa presidente di ACFF Muzanin Wever pa despues esaki guia e mandatario na e standsnan di e diferente institutonan di enseñansa di Hulanda, Merca y Aruba.

Akinan sr. Besaril a papia cu e representantenan di e Hogeschoolnan, manera Fontys Hogeschool, Saxion Hogeschool, Hogeschool van Arnhem en Nijmegen y Hogeschool van Amsterdam. Sr. Besaril a mustra su aprecio pa e presencia di e Hogeschoolnan cu di e manera aki nos studiantenan por haya informacion di e diferente estudionan cu e Hogeschoolnan aki ta brinda.



E mainta ey tambe tabata tin un presentacion di Arubahuis bou e titulo “ Studeren in Nederland”. Na e ocacion aki minister Besaril a tene un discurso cortico na e sala yen di alumnonan cu ta pensa di bay studia na Hulanda. Akinan e mandatario un biaha mas a ripiti cu Arubahuis pa basta luna caba a tuma e initiativa pa informa e studiantenan prome cu nan bin Hulanda pa studia. ‘Awe nos tey akinan na e College Fair pa duna informacion na esnan cu ta pensa pa bay studia na Hulanda. Nos a ripara e aña aki cu un gran parti di e grupo cu a bin Hulanda no tabata bon prepara, por ehempel nan no tabata tin un lugar di keda. Tambe nos a ripara cu tin hopi studiante ta scoge pa studia International Business, mientras cu nos ta kere cu tin otro opcionnan. Nos como gobierno ta bezig ta desaroya e Blue Economy y akinan tin oportunidad pa future profesionals,’  asina minister Besaril a bisa.

E mandatario a sigi bisa cu Arubahuis lo bay tene presentacionnan na e scolnan pa educacion secundario, manera Colegio Arubano na Oranjestad y San Nicolas y EPI.



Despues di e discurso di minister Besaril, coordinador di departamento di Enseñansa di Arubahuis James van der Linde a duna un presentacion riba e diferente aspectonan di studia na Hulanda. Varios aspect a bin na vigor, manera e cultura Hulandes, e opcionnan pa studia na Hulanda y e problematico di haya un camber. Den loke ta e facilidadnan pa orienta bo mes riba un estudio James a duna informacion riba [Studiekeuze123] di ministerio di Enseñansa di Hulanda y tambe [Studielink].

Cu e informacion aki hopi detaya Arubahuis ta spera di por a brinda e future studiantenan e oportunidad pa nan por haci un escogencia basa riba informacion amplio.

E presentacion aki tambe por wordo mira riba e Facebook pagina di Arubahuis @Onderwijszaken Arubahuis.



Aki por download e presentacion di Arubahuis: Studeren in Nederland


Info / Contact

Pa mas informacion por tuma contacto cu:

Scroll To Top
  • © 2011-2019 Department of Education Aruba (DEA)
  • T +297-528-3400
  • F +297-528-3434
  • info@ea.aw