Search Facebook Instagram Twitter

Perspectiva Mundial IPA 2017

March 6, 2017

Durante e di tres aña di e estudio na Instituto Pedagogico Arubano (IPA) e studiantenan ta participa na e programa Perspectiva Mundial. E programa aki ta brinda e studiantenan e oportunidad pa profundisa nan mes den e aspectonan di e profesion di maestro den exterior.

E tema di e programa Perspectiva Mundial pa e aña academico aki ta: Sustainable Lifestyle; un condicion pa un estilo di bida sano y balansa pa nos mes y pa comunidad di Aruba.

E programa aki ta pone mas enfasis riba e integracion di e concepto Desaroyo Sostenibel den dunamento di les na scol. E ta prepara studiante pa aporta na un futuro duradero y ta ofrece nan conocemento y habilidad. Alabes e ta forma nan manera di pensa uzando diferente tema den klas.

Perspectiva Mundial ta inclui un pasantia internacional di un luna. Pa e teoria ta  mas cerca di practica, Perspectiva Mundial ta brinda e studiantenan e oportunidad pa profundisa nan mes den e aspectonan di Desaroyo Sostenibel, den e pais cu nan ta bishita.

Hunto cu e ekipo di  Bureau Internationalisering di IPA a logra cera acuerdo cu e universidadnan di e paisnan cu e studiantenan a scoge, pa prepara un programa dirigi riba Enseñansa di Desaroyo Sostenibel.

Como preparacion pa e pasantia internacional e studiantenan ta participa na diferente tayer, charla y excursion. Un ehempel ta e excursion cultural historico bou di guia di docente drs. Gregory Richardson den e districto di San Nicolas. El a elabora riba diferente monumento manera Watertoren y Misa Santa Theresita. Tambe e studiantenan a haci un recorido den e cayanan di Village y den caya princinpal di San Nicolas.

Otro ehempel ta bishita di Museo di Industria. E studiantenan a haya un recorido y informacion for di señor Renwick Heronimo, curator di e museo. Señor Heronimo a elabora riba e historia industrial di Aruba, den cua a enfoca riba e periodo di oro, fosfaat, petrolio y turismo.

Tambe e studiantenan a haya un tayer di Capoeira duna door di entrenador Kevin Richardson. Durante e tayer el a elabora riba e historia di e baile arte marcial Brazilero y su conexion cu desaroyo sostenibel personal. Ta trata aki di un balansa cu mester den tur aspecto di bida, mescos cu ora ta den e baile dentro di e circulo conoci como e Horda.

E programa Perspectiva Mundial ta enfoca riba aspecto di Desaroyo Sostenibel cual ta entre otro: PeoplePlanet, Profit y Participatory Governance. Cu e pasantia internacional IPA kier stimula su studiantenan pa bira un habitante cu pensamento tanto local y global.

E studiantenan a scoge e aña aki pa un pasantia na Argentina, Merca (Baltimore & New York), Hulanda y BelgicaSpaña (Barcelona) y Puerto Rico. E studiantenan lo haci nan investigacion a base di e  tareanan ricibi for di IPA, excursion na diferente instituto y tayer na e universidadnan y haci entrevista cu persona renombra den ramo di sostenibiladad. Naturalmente e studiantenan lo bishita diferente scol basico y preparatorio p’asina nan mira con ta duna forma na sostenibilidad den enseñansa.

Despues di nan regreso, e studiantenan lo haci investigacion na nan scol di practica aki na Aruba. Nan lo haci comparacion entre e dos paisnan y presenta e resultadonan den luna di april na henter e comunidad di Aruba, specialmente na esnan den enseñansa.

Un palabra di gradicimento ta bay na  tur persona of instancia cu tambe a contribui di un manera of otro na e biahe di e studiantenan. Alabes IPA ta gradici e famia di e studiantenan pa nan sosten.

IPA ta desea e studiantenan hopi exito den Perspectiva Mundial y despues den nan pasantia.

 


Info / Contact

Pa mas informacion por busca den e alfabet menu riba homepage: [I] Instituto Pedagogico Arubano (IPA) of por tuma contacto cu IPA

Scroll To Top
  • © 2011-2023 Department of Education Aruba (DEA)
  • T +297-528-3400
  • F +297-528-3434
  • info@ea.aw

By orbitalnets