Minister Yrausquin na Wageningen University and Research

July 18, 2017

Den Haag – Minister Plenipotenciario Juan David Yrausquin a haci un bishita di trabou hunto cu funcionario di Arubahuis Roy Hart na Wageningen University and Research (WUR).

Potretnan cortesia di Arubahuis

Nan a wordo ricibi pa gerente cu ta encarga cu e mercado di America-Latina Ria Hulsman, tambe pa Dolfi Debrot, Gerente di Reseach Marina, Ana Lopez Contreras, Scienstist  y Rene Henkens, Ecologist.

Sra. Hulsman a duna un splikacion di WUR. E scol tin un total di 10.000 studiante y 6000 personal. Pa aña tin 4200 studiante ta hasi nan Bachelor, 4200 studiante ta studia pa nan Master y 1900 studiante ta studiando pa nan Phd. Riba e tereno di e scol tin diferente compleho caminda e studiantenan ta biba.

E studiantenan ta bin for di 100 pais rond mundo. Sigun Sra. Hulsman WUR ta  den e miho tres di universidadnan di mundo pa locual ta trata agricultura. WUR tin un oficina na China y esey ta e unico establecimento cu nan tin den un otro pais. Tin 10% di studiante procedente di Alemania cu ta studia na WUR.

Ana Lopez Contreras a duna un presentacion riba estudionan cu su departamento ta hasi riba Biorefinery, caminda plastic ta wordo traha cu zeewier. Despues por a scucha presentacion di Rene Henkens riba Spaans Lagoen na Aruba, caminda WUR a haña ‘opdracht’ di Ministerio di Asuntonan Economico di Hulanda cu ta encarga cu “rampgebieden” pa paisnan den Reino pa hasi un estudio riba diferente localidad na Aruba e.o. e brug nobo na Balashi y e Green Corridor.

Nos por a compronde cu tur e proyectonan aki no ta hasi ningun daño na e naturalesa na Aruba. Despues tabata tin presentacion di Dolfi Debrot cu a duna  di conoce cu Aruba por duna mas balor pa engrandece turismo door di enfoca riba buceo (duiken), cual lo por bira un ‘niche market’ importante pa Aruba.

E la menciona Mangel Halto como un tremendo lugar pa duik. Tambe e la splika cu Aruba tin e oportunidad pa  bira mas grandi como “Kennis Toerisme”. Por ultimo a ser menciona cu lo por planta matanan cu no mester di hopi awa, manera cactus y aloe, y tambe crea un mercado profesional di piscadera pa consumo local y te hasta pa exporta.

 

Despues di tur e presentacionnan Minister Yrausquin a duna informacion riba e desaroyonan cu ta tumando lugar na Aruba y tambe e vision di gobierno pa atrea mas compania y institutonan Hulandes pa Aruba.

Minister Yrausquin a menciona tur e companianan cu ta activo na Aruba,  manera Schiphol Group, TNO, Port of Amsterdam, Rietveld Academie, Iskes, Qredits, Pfixx y Nirint Shipping.  Basa riba esaki WUR lo por evalua pa habri un filial na Aruba den futuro y bira un centro di conosemento pa region.

Finalmente Minister Yrausquin a gradici e gerentenan di WUR pa nan  presentacion y a invita nan pa bai Aruba pa wak kico ta e posibilidad pa futuro pa traha hunto riba proyectonan.

 


Info | Contact

Pa mas informacion por busca den e alfabet menu riba homepage: [S] Studia na Hulanda] of por tuma contacto cu Kabinet van de Gevolmachtigde Minister van Aruba – Arubahuis

Scroll To Top
  • © 2011-2019 Department of Education Aruba (DEA)
  • T +297-528-3400
  • F +297-528-3434
  • info@ea.aw