Minister di Enseñansa a reuni cu SMOA

February 11, 2016

Recientemente Minister Michelle Hooyboer-Winklaar a tene un reunion fructifero cu e Raad van Toezicht di SMOA cu ta maneha Colegio Arubano, riba e situacion rond di e Rector actual Hans Timmermans.

Meta di e reunion tabata pa haya claridad riba e situacion y tambe pa discuti cu SMOA pasonan concreto cu mester tuma pa garantisa continuidad y percura pa trankilidad den e organisacion. Minister Hooyboer-Winklaar tambe a mustra riba e urgencia pa SMOA fiha e prioridadnan mirando e situacion actual cu mester ta na bienestar di e alumnonan y docentenan di Colegio Arubano.

For di e representantenan di SMOA, Bart Kool y Robert Croes a compronde cu en berdad e situacion a surgi cu e ausencia di e Rector actual ta uno complica y cu a trece diferente reto pa e organisacion. E reunion cu representantenan a bai den un bon sfeer y a logra papia riba diferente topico.

Minister Hooyboer-Winklaar a haya confirmacion cu Hans Timmermans ta malo na Hulanda y cu SMOA a percura pa tin un declaracion y a haci e contactonan necesario cu bedrijfsarts na Hulanda y tambe SVB na Aruba. No tin claridad riba con largo e situacion aki por dura, pero SMOA a garantisa cu nan tin contacto regular cu Timmermans pa asina evalua e situacion. Mientrastanto SMOA a nombra un “Waarnemend Rector” y un “Tweede Waarnemer” pa garantisa continuidad den e organisacion.

Pa loke ta e diferente procesonan y proyectonan interno y externo na unda SMOA/Colegio Arubano ta envolvi, a discuti continuidad y prioridad di esakinan cu e miembronan di Raad van Toezicht di SMOA. Entre e proyectonan interno a papia di e “Ipad project” cu ta den fase di preparacion y cual iniciativa ta di Timmermans. For di SMOA a compronde cu e “Ipad project” falta poco mas preparacion pa asina por formula e “projectdossier” pa por bay over na implementacion.

Minister Hooyboer-Winklaar a indica cu asina tur informacion y condicionnan ta na ordo, cu e ta dispuesto pa sostene e proyecto aki como un “pilot” pa enseñansa secundario y cu eventualmente lo beneficia tur scol na Aruba. Alabes e mandatario a enfatisa na e miembronan di SMOA cu den e situacion actual mester fiha hopi bon kico ta prioridad y tambe kico realmente lo contribui na un mehoracion di e esfera den e scol, na e efectividad di e organisacion y na miho resultado di e alumnonan. Minister Hooyboer-Winklaar a pidi SMOA un proposicion cu accionnan concreto riba termino cortico.

Manera menciona SMOA y Colegio Arubano tambe ta envolvi como partner den diferente proceso y proyectonan externo manera e implementacion di e “functiehuis” nobo pa sector di Enseñansa y tambe “Commissie AVO” pa realisa mehoracion y miho conexion den “Algemeen Voortgezet Onderwijs” na Aruba. Mirando cu e Rector actual ta e persona cu tabata representa SMOA den e diferente proyecto y comisionnan aki, a palabra cu e Raad van Toezicht cu lo informa Ministerio di Enseñansa mas pronto posibel ken lo reemplasa e Rector ausente pa garantisa nan participacion y continuidad di e proceso.

Minister Hooyboer-Winklaar ta reconoce cu Colegio Arubano ta pasando den un aña hopi dificil y ta lamenta tur e incidentenan di e ultimo lunanan mirando cu esakinan a trece un luz negativo riba e scol y ta traha na un manera hopi negativo y demotivante riba docentenan y alumnonan. E mandatario ta convenci cu SMOA mester inverti mas den e comunicacion cu tur actor den y rond di e scol pa asina evita mal comprendemento y conflicto innecesario.

Minister Hooyboer-Winklaar ta spera cu a pesar di tur cos, SMOA y Colegio Arubano por keda concentra riba nan “core business”, cu ta educacion y formacion di nos hobennan di Aruba teniendo e alumno central.

 


Info / Contact

Pa mas informacion por busca den e alfabet menu riba homepage: [M] Ministerio di Enseñansa

 

Scroll To Top
  • © 2011-2019 Department of Education Aruba (DEA)
  • T +297-528-3400
  • F +297-528-3434
  • info@ea.aw