Minister Bussemaker na Aruba

December 5, 2016

Minister di Enseñansa, Cultura y Ciencia di Hulanda, Jet Bussemaker, recientemente a bishita tur e islanan di Caribe Hulandes pa por a tuma nota di cerca di diferente desaroyo y iniciativanan riba e islanan y tambe intercambia informacion y pensamento cu Gobierno y diferente stakeholders importante.

 

Themadiner Onderwijs

E programa di bishita di Minister Bussemaker na Aruba a inclui un themadiner onderwijs unda e mandatarionan di Aruba y Hulanda conhuntamente a host un grupo di persona di enseñansa como tambe di sector priva.

Durante e themadiner aki a toca diferente tema interesante y actual pa cu enseñansa na ArubaHulanda y Reino manera conexion entre enseñansa y sector laboralcooperacion riba e nivel di enseñansa superior den region y e retonan di nos sistema educacional. E anochi tabata uno ameno unda cu cada un presente por a duna nan punto di bista cu a percura pa un dinamica y intercambio hopi positivo durante e themadiner.

E bishita di Minister Bussemaker tambe a inclui diferente reunion oficial manera un bishita na su excelencia Gobernador di Aruba, un reunion cu Minister President di Aruba den su calidad como Minister responsabel actualmente pa Cultura y un reunion bilateral cu Minister Hooyboer-Winklaar.

Durante di e reunion bilateral entre e dos ministernan di enseñansa a toca diferente tema di interes comun y tambe temanan importante pa Aruba.

 

Decentrale selectie

Un di e temanan central di e reunion tabata e accesibilidad di enseñansa superior di Hulanda awo cu introduccion di decentrale selectie. Pa Minister Hooyboer-Winklaar e ta sumamente importante pa keda garantisa e accesibilidad pa nos studiantenan Arubiano na Hulanda y pa anticipa riba cualkier posibel obstaculo y pa conhuntamente cu su colega Minister di Hulanda sondea e solucionnan pa cu esaki.

Minister Bussemaker a reconoce e posibel retonan cu e decentrale selectie por trece specialmente pa studiantenan di e islanan di Caribe y a palabra cu e lo pone e topico aki halto riba agenda di su bestuurlijk overleg cu e organisacionnan cu ta representa e institutonan di enseñansa superior na Hulanda. For di banda di Aruba a palabra cu nos lo facilita cu tur informacion di casonan ambos positivo y menos positivo cu nos scolnan y studiantenan ta wordo confronta cu ne pa asina hunto por keda monitor e situacion di cerca.

 

DUO ta habri cuenta di banco local

Un topico importante cu tambe a keda discuti entre e mandatario di Aruba y di Hulanda ta financiamento di estudio di Hulanda conoci como DUO. Despues di un periodo largo di intercambio y deliberacion entre e paisnan a yega asina leu cu Minister Bussemaker por a anuncia cu DUO lo habri un cuenta di banco local na Aruba pa facilita e pago di debe di estudio di ex studiantenan. Esaki tabata un deseo di Aruba y di e otro islanan den reino pa hopi tempo caba y finalmente esaki a bira posibel. Cu e cuenta di banco local e pago di debe di estudio lo bira mas facil y menos costoso pa nos studiantenan di Aruba.

 

Bishita na IPA

Pa finalisa e parti di e programa di enseñansa, Minister Bussemaker a haci un bishita na Instituto Pedagogico Arubano (IPA). Aki e mandatario a ricibi informacion riba tur e proyectonan di cooperacion den reino incluyendo islanan BES na unda cu IPA ta hungando un rol importante. Un ehempel di esaki ta e programa di estudio cu ta wordo ofreci door di IPA como tarea di Ministerio di Enseñansa di Hulanda pa profesionalisa y certifica e maestronan di Sint Eustasius.

E bishita di Minister Bussemaker  na Aruba a culmina cu bishita na dos museo y un recorido door di San Nicolas.

Minister Bussemaker a keda sumamente satisfecho cu su bishita na Aruba y a sigui diabierna anochi pa su bishita oficial na e isla di Corsou.

E palabracion di mas importante ta e compromiso cu ambos pais a reconfirma na otro pa sigui colabora di cerca riba e areanan di enseñansa, cultura y ciencia na beneficio di e ciudadanonan di cada pais y di Reino den su totalidad.

 


Info / Contact

Pa mas informacion por busca den e alfabet menu riba homepage: [M] Ministerio di Enseñansa

Scroll To Top
  • © 2011-2019 Department of Education Aruba (DEA)
  • T +297-528-3400
  • F +297-528-3434
  • info@ea.aw