Mas cupo pa e Academic Foundation Year
Door di interes grandi Ministerio di Enseñansa a pone fondonan adicional disponibel pa amplia e cantidad di cupo pa e programa “Academic Foundation Year” na Universidad di Aruba.
 |
Na luna di maart a tuma luga ceremonia oficial di firmamento pa financiamento di e “Academic Foundation Year”, den cual Universidad di Aruba ta ricibi fondonan di OCW di Hulanda pa medio di Fondo Desaroyo Aruba pa diseña e programa, y fondonan di Ministerio di Enseñansa pa opera e programa durante e aña academico cuminsando September proximo. |
E cantidad di cupo pa studiantenan tabata poni inicialmente na un maximo di 40 studiante, pero for di inicio studiantenan a mustra un interes hopi grandi pa participa na e programa aki. Despues di e “Open House” di Universidad na April y e start di temporada di aplicacion por a tuma nota cu e studiantenan a aplica masalmente pa participa na e programa y den cuestion di dia ya a surpasa e cantidad maximo cu a wordo programa.
A base di e interes grandi aki Minister Hooyboer-Winklaar a comunica cu Universidad di Aruba pa hunto explora e posibilidadnan pa amplia e cantidad di cupo pa e Academic Foundation Year. E punto di salida di e minister ta cu nos mester brinda studiantenan cu a mustra e interes un oportunidad pa participa.
 |
“Ta nos deber y responsabilidad pa crea e condicionnan necesario pa un grupo mas grandi di studiante tin acceso na e programa aki. Pa selecta of nenga un grupo grandi di studiante sin mas no ta un opcion y pesey nos a boga pa sigura entrada pa mas studiante mirando cu e demanda pa esaki ta mustra e necesidad,” Minister Hooyboer-Winklaar a enfatisa.
E titular di enseñansa ta contento di anuncia cu a yega na un acuerdo cu Universidad di Aruba pa redobla e capacidad di e programa. E fondonan adicional a crea e posibilidad pa un total di 80 studiante por participa na “Academic Foundation Year” pa aña academico 2016-2017.
Programa
E Academic Foundation Year ta encera e desaroyo y introduccion di un programa preparatorio na nivel academico pa tur studiante cu tin e necesidad di un miho orientacion y preparacion prome cu inicia nan estudio den enseñansa superior. E programa aki ta full-time, tin un duracion di un aña y ta consisti di ‘60 credits’.
E programa ta basa riba tres pilar importante, cu ta idioma, orientacion academico y profesional, y desaroyo di competencianan academico. E programa lo enfoca riba diferente idioma, dependiendo di e escogencia di e studiante.
E programa ta enfoca riba studiantenan cu a finalisa HAVO, VWO of MBO y lo wordo ofreci anualmente na tur studiante interesa pa sigui e programa aki.
E Academic Foundation Year ta un iniciativa di Universidad di Aruba hunto cu Ministerio di Enseñansa di Aruba y ta conta cu sosten financiero di Ministerio di Enseñansa di Hulanda.
Minister Michelle Hooyboer-Winklaar ta masha contento cu e proyecto aki a bira realidad mirando cu e ta convenci cu e programa aki lo por contribui na un miho conexion y miho rendimento den enseñansa superior. E minister ta indica cu ta constata cu tin hopi factor cu ta stroba nos studiantenan ta exitoso den nan estudio y un di nan sigur ta e parti di preparacion y orientacion academico. Tin hopi studiante cu tin duda den kico nan bay studia y/of no ta sinti nan mes cla pa tuma e stap pa sigui den enseñansa superior. E programa aki lo mester facilita e hobennan cu e guia, conocemento y competencianan necesario pa nan haci e stap mas sigur pa un estudio avansa.
Minister Hooyboer-Winklaar ta gradici Universidad di Aruba pa tur nan esfuerso pa por haci e ahustacionnan necesario posibel y pa pone e interes di nos studiante na prome luga. Tur studiante cu ya a aplica y cu ta riba e lista di espera por tuma contacto cu Universidad di Aruba pa ricibi confirmacion di nan participacion. E minister ta desea tur e studiantenan hopi exito cu e programa y ta spera cu nan saca lo maximo di e experencia aki.
 |
Info | Contact
Pa mas informacion por busca den e alfabet menu riba homepage: [University of Aruba] of por tuma contacto cu: [University of Aruba].
Scroll To Top
