Search Facebook Instagram Twitter

Maestronan satisfecho cu curso di Disciplina Consciente

April 25, 2013

Durante e dos ultimo añanan mas di 800 maestro di scol preparatorio (kleuter) y basico y e lidernan di Traimerdia a participa na e curso aki, cual a wordo organisa pa Develop to Grow bou encargo di Minister di Enseñansa.


Experiencia di un Maestra

“Conscious Discipline ta un di e miho cursonan cu nos a haya den hopi aña”. Como maestra di scol di klas 2b na Sint Annaschool, na momento cu e scol tabata cla pa habri na su portanan bek den su edificionan bunita renoba, ubica patras di Misa Santa Ana na Noord, Sharlene Starke a expresa cu e tabata un poco emociona y hopi orguyoso di ta parti di un hoya di scol ful ful renoba. E sentimentonan  aki tabata comparti pa su coleganan y mas ainda pa e mas of menos 260 mucha kende a yega scol cu hopi entusiasmo dialuna mainta tempran pa e reapertura di nan dushi scol.

Papiando cu e maestra tocante desaroyonan presenta den e ultimo tres añanan, cu e cartera di enseñansa bou maneho di Minister Arthur Dowers, el a expresa su mes hopi positivo specialmente encuanto e curso “Conscious Discipline”, o sea Disciplina Consciente cual a wordo ofreci na tur scol pa e mandatario.

“Den mi opinion personal, Conscious Discipline ta un di e miho cursonan cu nos a haya den hopi aña” Sharlene a subraya. El a splica cu enseñansa ta algo dinamico y p’esey ta sumamente importante pa e maestronan sigui reeduca nan mes, cu nan mester sigui purba metodonan nobo y pa medio di cursonan asina ta brinda oportunidadnan pa desaroyo pa e maestronan.

E balor di e curso Conscious Discipline pa Starke ta cu e maestronan ta traha hopi intensivo hunto pa dos dia y ta siña con pa establece reconexion cu e alumnonan bou guia di Jill Molli, un facilitado internacional di reputacion halto riba e topico di Conscious Discipline.

Starke a splica cu den su caso el a haci hopi mas uzo di Conscious Discipline y, separa di e curso cu e scol a sigui di Netwerk Leren e no tabata envolvi den ningun di e rednan. Netwerk leren ta un forma di traha hunto unda cu maestronan y Interne Begeleiders (IB-ers) ta forma rednan di trabao pa discuti y traha riba diferente topico, pregunta y problematica den enseñansa pa yuda otro haya contestanan y solucionnan basa riba experiencia di otronan y nan experticio.

Juffrouw Sharlene a conta cu despues di tuma e curso di Conscious Discipline diferente miembro di e team di Sint Annaschool a cuminsa aplica loke nan a siña y nan resultadonan tabata hopi positivo. Di berdad a ripara cambio den algun mucha, pasobra e maestronan a cuminsa aplica loke nan a siña durante di workshopnan aki.


Minister di Enseñansa

Minister di Enseñansa (Dowers) ta haya cu ta di sumo importancia pa nos educadornan ta bon prepara, profesional y ekipa cu e hermentnan necesario pa duna e miho resultadonan den enseñansa.  Ofreciendo e workshop Conscious Discipline na nos maestronan, Minister Dowers ta contribui na nan desaroyo, un miho conexion y un miho acercamento cu nos hobennan pa haya nan comporta miho den klas y hasta na cas como cu nan ta wordo yuda pa cultiva y promove e bon comportamento na scol.


Info / Contact

Pa mas informacion por busca [D] Disciplina Consciente of [C] Conscious Discipline den e alfabet menu riba nos homepage of tuma contacto cu:

Scroll To Top
  • © 2011-2023 Department of Education Aruba (DEA)
  • T +297-528-3400
  • F +297-528-3434
  • info@ea.aw

By orbitalnets