Search Facebook Instagram Twitter

Lectura na Universidad di Aruba

March 4, 2016

Ministerio di Enseñansa conhuntamente cu Universidad di Aruba ta organisando un lezing pa publico titula “Diversifying the educational system in Aruba: the possible introduction of the International Baccalaureate”.

E lezing aki lo tuma luga diahuebs dia 10 di maart proximo den e aula di Universidad di Aruba y lo cuminsa pa 7:30 di anochi. Como invitado special y orador pa e lezing aki lo ta presente sr. Michael Leshner, kende ta Manager of Outreach and Regional Development pa IB Americas.

E focus di e lezing lo ta riba e sistema educational conoci como International Baccalaureate (IB) y e posibilidadnan y e beneficionan pa Aruba. Durante di e lezing sr. Micheal Leshner lo duna informacion riba e diferente programanan cu IB ta ofrece, entre otro e “Primary Years Programme”, e “Middle Years Programme”, e “Career-related Programme” y e “Diploma Programme”.

The International Baccalaureate Organization ta un organisacion prestigioso y internationalmente reconoci y cu ta activo na mas cu 100 diferente pais. Actualmente tin mas cu 4000 school rond di mundo cu ta aplica e curriculo y pedagogia di International Baccalaureate.

E bishita di sr. Leshner na Aruba ta consisti di un programa cu ta inclui entre otro un seminario pa tur stakeholders den nos enseñansa riba nivel di maneho y directivanan di school como tambe e lezing pa publico en general. Ambos e seminario como e lezing pa publico general ta e prome stap den e proceso di exploracion y e discussion nacional riba e ambicionnan di Gobierno di Aruba y Minister di Enseñansa pa diversifica nos sistema di educacion aki na Aruba.

Minister Hooyboer-Winklaar ta indica cu den su calidad di Minister di Enseñansa e tabata tin e oportunidad di bishita diferente pais pa asina experiencia y compara e diferente sistemanan di educacion cu otro. Durante e diferente bishitanan por a observa con diferente sistema ta co-existi banda di otro den un pais, bou di un directiva di school of hasta den un solo school.

Minister Hooyboer-Winklaar ta enfatisa cu tin un necesidad y demanda grandi pa diversifica nos sistema educacional na Aruba, pa asina crea mas opcion y oportunidad pa mayornan y alumnonan. E urgencia pa diversificacion tambe ta basa riba e necesidad pa nos sistema educacional ta un miho reflexion di nos contexto local y nos economia.

E titular di enseñansa ta menciona di ta convenci cu diversificacion di nos sistema educacional lo haci enseñansa mas accesibel, mas atractivo y mas efectivo pa nos studiantenan y esaki lo traduci su mes den un impacto positivo riba e desaroyo social y economico di nos pais.

Tur interesado ta keda cordialmente invita pa e lezing pa publico general riba e topico aki cu lo tuma luga diahuebs 10 di maart 2016 cuminsando pa 7:30 di anochi den e aula na Universidad di Aruba.

 


Info | Contact

Pa mas informacion por busca den e alfabet menu riba homepage: [University of Aruba] of por tuma contacto cu: [University of Aruba].

Scroll To Top
  • © 2011-2023 Department of Education Aruba (DEA)
  • T +297-528-3400
  • F +297-528-3434
  • info@ea.aw

By orbitalnets