Search Facebook Instagram Twitter

ISL Training

April 18, 2017

Recientemente Ministerio di Enseñansa a organisa un training di International School Leadership (ISL) pa e cabesantenan, directornan, rectornan di scol y diferente instancia di enseñansa. Tur cu a participa na e training aki a haya e oportunidad di sinta hunto y discuti diferente topico di enseñansa, siña for di experiencia di otro y delibera riba kico ta e miho implementacion cu por bin cun’e pa nan scol.

Nunca antes nos tur a yega di bini hunto pa papia riba mehora Enseñansa

Director di Departamento di Enseñansa, Anne-Marie Proveyer-Groot

E experiencia di International School Leadership tabata uno masha bunita mes pe Director di Departamento di Enseñansa, señora Anne-Marie Proveyer-Groot. Un di e puntonan cu el a haya hopi bon ta cu nan a discuti riba topiconan di enseñansa. Proveyer tin hopi aña trahando den enseñansa y el a ripara cu e añanan anterior no tabata discuti den diferente setting hunto riba e calidad di enseñansa, kico ta importante y nan no tabata reflexiona riba e trabou cu nan ta haciendo. Pero e training aki a duna nan e espacio ey y banda di esey nan a haya un structura, un forma di traha cu tur hende por a relata na otro.

Diferente tipo di enseñansa a haya diferente tipo di scholing. Den e recapacitacion ey cada bes ta for di diferente hende nan a haya les. Awo minister a percura cu tur directiva, tur leadership den enseñansa, di tur e 83 scol incluyendo tur instancia cu tin di haber cu enseñansa tabata hunto den un training. Tur a pasa den mesun cosProveyer a remarca. E intencion ta pa nan sigui implementa e forma di traha y uza e mesun materialnan pa nan por sigui desaroya enseñansa en general.

 

Awor ora nos bishita un scol nos tur por papia riba mesun ‘nivel’

Inspector general di Enseñansa, John Hessen

E training di International School Leadership (ISL) a wordo duna pa director y cabesantenan di scol, pero Departamento di Inspeccion di Enseñansa tambe a haya e oportunidad pa participa.

E tabata un tremendo experiencia, Inspector general di Enseñansa, señor John Hessen a remarca. Hopi di e topiconan tabata relata cu e trabounan di e cabesantenan cu kisas pa e departamento di Inspeccion di Enseñansa no ta relevante, pero asina mes hopi caminda nan por a pone link cu locual Inspecccion di Enseñansa ta haci y loke ta pasa na un scol.

Banda di esey loke cu tabata hopi importante ta cu nos por a debati over di diferente punto, aspectonan cu ta pasa den enseñansa, hunto cu directornan di scolnan cu normalmente bo ta bishita como inspectorHessen a remarca. Durante e training nan a haya e oportunidad di papia over e experiencia cu director y cabesantenan tin, pero tambe loke Inspeccion ta mira y director y cabesantenan ta mira. E intercambio di pensamento di ideanan y experiencia tabata un meerwaarde enorme.

Pa Departamento di Inspeccion di Enseñansa y cabesantenan tabata hopi bon cu nan por a sinta hunto pa 1 siman largo y papia riba enseñansa. Departamento Inspeccion di Enseñansa sa kico a wordo duna durante e training di ISL, kiermen na momento cu nan bishita cabesantenan, nan por duna un conseho of stimula nan. Nos sa tambe awo ora cu bay kico por spera, pasobra cada un di e cabesantenan a haya cierto tarea y a expresa cierto kico nan lo bay haci. Ora nos bishita un scol, nos por papia riba e mesun nivel. Esey sigura ta algo cu nos lo implementa ora di bishita e scol y mustra bek con bo ta ehecut’e, con bo ta impliment’e, asina Hessen a remarca.

 

ISL a duna nos e oportunidad pa intercambia idea y tipnan

Cabesante Jane Bueno-Hooft

Cabesante di Abraham De Veerschool MAVO a participa na e training di Internacional School Leadership y ta haya durante e training aki a haya e oportunidad di intercambia idea y tipnan pa mehora scol. ISL a bay hopi bon pasobra prome biaha bo ta mira e lidernan di scol na Aruba henter ta bini hunto, locual casi nunca bo no ta haya oportunidad asina pa intercambia ideanan y tipnan con bo ta haci na bo school, con abo ta haci’e na bo scol. Esey ta algo cu mi a haya ta hopi bunita y mi ta spera cu lo bay tin mas oportunidadnan asina,”segun e cabesante.

E contenido di locual a presenta tabata hopi interesante. Bueno-Hooft ta un lider di un scol cu un edificio practicamente nobo y durante ISL nan a haya tipnan con pa haci’e miho. Bo a mira hopi aña aden, aña afo con e ta wordo haci. Bo ta mira kico a bay robes y kico por haci miho. Esey mi a haya hopi interesante den e parti di effective schools. Tambe e chartnan cu nan a duna con bo por haci’e miho na un scol. Nos ta trahando ariba esey poco poco pa hiba e school mas dilanti.”

Aworaki na Abraham De Veer School nos ta implementa na e momentonan aki caba algun cambio pa haci e scol mas efectivo, kiermen effective schools. Tambe e John Hattie Mindframes ta hopi interesante.

Abo como school leider por haci un cambio den bo scol. Kiermen, esaki ta significativo pa bo scol y cu bo por stimula docentenan tambe. Ami ta pensa tambe y kere firme cu un scol ta draai bon ta ora bo docentenan ta contento. Anto docentenan contento tin muchanan contento. Esey ta hopi importante. Mi ta haya hopi bunita cu e scolnan ta bin hunto, pero esaki no mester keda asina. Esaki mester bira un collaborative school participacion, cu tur e schoolnan ta bini hunto pa nan coopera cu otro, dus ora ey nos lo hiba e enseñansa di Aruba padilanti. Si un tin bon idea, otro tin un bon idea y nos pone nan hunto, e ta bira un big great idea. Kiermen e ora ey esey ami ta pensa lo ta bon pa Aruba, pa nos hiba e scol dilanti y no competi cu otro, pero mas bien complementa otro.”

 

Conrector Colegio Arubano, Anuesca Baly

Pa prome biaha Conrector di Ciclo Basico 1 y 2 di Colegio Arubano, señora Anuesca Baly, a presencia algo asina aki manera e training di ISL, unda cu tur cabesante di scolnan a yega hunto y por a intercambia idea cu otro aunke cu tabata tin diferente scol y diferente nivel. Asina mes e problemanan cu nan ta pasa den nan trabou diariamente ta comun, e ta mescos na tur otro scol.

Ami a experienci’e como hopi bon. Nos a sinta cu e managernan di EPB Hato y San Nicolas. Ami a hay’e echt hopi leuk. Nos a click asina bon cu otro, cu nos a palabra pa bishita otro y haci cierto cosnan cu otro na nan scol”, Baly a remarca. Nan a scucha ideanan di otro manera con EPB ta atende cu alumnonan cu ta yega laat scol. Tabata tin ideanan cu Colegio Arubano tin, pero otro scolnan tambe tabata tin mescos y nan tabata intercambia esaki.

E trabou no ta mucho diferente, ta e nivel ta otro di e alumnonan. E problematica bo ta haya nan eynan como akinan. E no ta importa si e nivel di un alumno ta mas halto cu otro. Si ta problema di cas, di siñamento of educacion, ta e persona. E no ta bay pe nivel, asina Baly a remarca.

Nan ta haya cu otro gobernantenan, ken cu por ta na mando, mester sigui cu tipo di trainingnan asina aki.

Si nos kier traha pa enseñansa di Aruba, nos mester pensa riba un nivel, no solamente di un scol secundario halto, pero nos mester pensa riba tur nivel. Esey ta loke a bin dilanti den e encuentro aki, asina Baly a remarca. Baly ta haya cu si nan tur pone cabes hunto y traha riba e fundeshi, nan lo yega na un bon enseñansa pa alumnonan di Aruba.

 

 

 

Pa mas informacion busca den e alfabet menu riba nos homepage:
M
Ministerio di Enseñansa
Info/Contact
Ministerio di Enseñansa

 

Scroll To Top
  • © 2011-2023 Department of Education Aruba (DEA)
  • T +297-528-3400
  • F +297-528-3434
  • info@ea.aw

By orbitalnets