IPA a start cu su Minor Globalization, Diversity and Multilingualism

October 3, 2019

Instituto Pedagogico Arubano (IPA) a sigui e aña aki cu su International Fall Minor yama Globalization, Diversity and Multilingualism.


E minor aki ta pa studiantenan internacional di Caribe, Latino America, Merca y Europa. E ta tuma luga durante e periodo di september 2019 te januari 2020. E studiantenan di e aña aki a bini principalmente di Hulanda entre otro: Hogeschool Rotterdam, Haagse Hogeschool y Thomas More Hogeschool.

E specialisacion di e studiantenan aki ta docente pa scol primario y secundario. Dos di e studiantenan aki a caba HAVO na Colegio Arubano y a bay Hulanda pa continua cu nan estudio. Ta trata di Kristine Trimon cu ta studiando Ingles na Hogeschool Rotterdam y Heidi Aristizabal Rianos cu ta studia Biologia na Hogeschool Rotterdam.

E programa di International Fall Minor ta enfoca riba Globalisacion, Diversidad, Multilingualismo y Enseñansa. Tin un enfoke grandi tambe riba desaroyo sostenibel delinea den e asina yama cinco P’s di sostenibilidad cual ta ‘Planet, People, Prosperity, Participatory Governance y Peace’.

E meta ta pa e studiantenan amplia nan horizonte, cera conoci cu e cultura y sistema di enseñansa di Aruba y haya conocemento didactico pedagogico, investigacion y tambe intercambia conocemento y experiencia.

E programa ta consisti di diferente actividad multidisciplinario unda e studiantenan ta participa na un serie di tayer, facilita pa varios docente di IPA y experto invita, riba diferente tereno manera: globalizacion, creolisacion, diversidad, arte y cultura, multilingualismo den enseñansa, sistema y maneho di enseñansa, investigacion y ciudadania.

Nan lo haci nan practica na diferente scol basico y scol secundario na Aruba. Tambe nan lo haci trabao boluntario y participa na diferente excursion rond di nos isla na entre otro San Nicolas, Oranjestad, Hooiberg y Parke Arikok.

 


Info / Contact

Pa mas informacion por busca [I] Instituto Pedagogico Arubano (IPA) den e alfabet menu riba homepage of por tuma contacto cu IPA

Scroll To Top
  • © 2011-2019 Department of Education Aruba (DEA)
  • T +297-528-3400
  • F +297-528-3434
  • info@ea.aw