Inversion grandi na buki y material nobo pa MAVO

September 22, 2017

Recientemente a logra aloca y inverti mas cu 1.5 miyon florin na buki y material nobo pa tur scol di MAVO di Aruba. Minister di Enseñansa a aloca e fondonan aki na comienso di aña den e Onderwijsfonds y Parlamento di Aruba a aproba esaki na luna di mei ultimo.

Minister di Ensenansa Michelle Hooyboer-Winklaar ta confirma cu ta trata aki di un suma total di Afl. 1.557.879,20 cu a pone disponibel pa bestel buki y material nobo pa e directivanan di scol di MAVO. Esaki ta inclui tur e 10 scolnan di MAVO di Aruba cu ta resorta bou di SKOA, DPS y SPCOA.

Mester menciona cu e suma total aki ta un inversion adicional na loke e directivanan di scol ta haya caba tur aña riba nan presupuesto pa inversion den material y metodonan nobo.

Cu e inversion adicional aki e titular di enseñansa kier a garantisa un impulso mas grandi den e renobacion di e metonan y material na MAVO unda cu a constata un necesidad grandi.

E suma total di mas cu 1.5 miyon florin a keda reparti bou di e directivanan di scol a base di e cantidad di scol y cantidad di alumno.

Unabes cu e fondonan a keda aproba Ministerio di Enseñansa a start cu e proceso di inventarisacion hunto cu e directivanan di scol.

Cada directiva di scol mester a indica nan necesidad y prioridadnan pa determina hunto cu nan scolnan y a base di esey por a cuminsa cu e proceso di pidi oferta.

E inversion ta inclui metodonan nobo pa diferente materia, material adicional pa maestronan y materialnan di sosten. Cada directiva di scol a indica un prioridad diferente y Ministerio di Enseñansa a duna e espacio pa esaki.

Mayoria di scol a scoge pa bestel metodonan nobo of e ultimo edicion di un metodo existente pa e diferente materianan manera e metodo “Nieuw Nederlands” pa Hulandes, “Gente Joven” pa e materia Spaño, e ultimo edicion di “Moderne Wiskunde” pa e materia Wiskunde, “NOVA NaSk” pa Natuurkunde y Scheikunde y e metodo “Biologie voor jou” pa e materia di Biologie.

Tin scolnan cu a pone nan prioridad diferente na otro metodonan y materia y tambe na material di sosten manera materialnan di ilustracion pa e materia Wiskunde, Atlassen pa e materia Aardrijkskunde y woordenboeken pa e idiomanan.

Mientras tanto a bestel tur e materialnan via di e diferente agencianan local y ta den proceso pa entrega nan na diferente scol di MAVO.


Norma di subsidio

E titular di enseñansa ta indica cu e inversion aki no ta encera un solo inversion pa ekipa e scolnan cu buki y material nobo sin mas, pero ta forma parti di un proceso mas sostenibel unda cu Departamento di Enseñansa ta encarga cu revision di e normanan di subsidio pa e directivanan di scol. E normanan aki ta encera e suma cu cada scol ta ricibi pa cada alumno y pa cada klas y ta encera tambe fondo aloca pa material pa scol.

Minister Hooyboer-Winklaar ta indica cu a aplica e normanan aki pa hopi aña, pero ta constata cu mester actualisa e normanan aki pa asina refleha e necesidad real di nos scolnan y nos muchanan.

E Minister di Enseñansa ta contento di por a inicia e proceso importante aki y ta spera cu hunto cu e inversion inicial y e ahustacion di normanan di subsidio, unda lo ekipa structuralmente e scolnan cu tur loke nan mester pa duna enseñansa di calidad nan nos hobennan.


Info / Contact

Ministerio di Enseñansa

Scroll To Top
  • © 2011-2019 Department of Education Aruba (DEA)
  • T +297-528-3400
  • F +297-528-3434
  • info@ea.aw